Bashkëkryetari i VLEN, Bilall Kasami, ka njoftuar se është mbajtur mbledhja e parë e Kuvendit Qendror të VLEN-it pas bashkimit të subjekteve politike në një strukturë të vetme.
Përmes një statusi në rrjetet sociale, Kasami theksoi se në mbledhje është zhvilluar një diskutim i frytshëm dhe konstruktiv, i fokusuar në vazhdimin e punës, zhvillimin e mëtejshëm të organizimit dhe përmirësimin e përfaqësimit politik të shqiptarëve në vend.
“Sot mbajtëm mbledhjen e parë të Kuvendit Qendror të VLEN-it pas bashkimit në një. Diskutim i frytshëm dhe konstruktiv, në vijën e vazhdimit të punës, zhvillimit dhe përmirësimit të përfaqësimit politik shqiptar në vend. Me këmbë të mbarë!”, ka shkruar Kasami.
Mbledhja konsiderohet si një nga hapat e parë organizativë të VLEN-it pas procesit të unifikimit, me synimin për forcimin e strukturave dhe koordinimin e veprimit politik në të ardhmen.
