Ministria e Punëve të Brendshme ende nuk ka arritur të kapë personin e dyshuar për vrasjen që tronditi Batincën e Shkupit një ditë më parë. Viktima, Agim Muharremi, 49-vjeç, ish-pjesëtar i Armatës, u ekzekutua me armë zjarri në mes të ditës, ndërsa autori i dyshuar, sipas burimeve jozyrtare, është Musa Xhaviti – një emër i njohur për organet e rendit.
Burime të afërta me hetimin bëjnë me dije se Xhaviti jo vetëm që ka qenë i dënuar më herët për armëmbajtje pa leje, por është gjithashtu i dyshuar edhe për një tjetër vrasje që ndodhi më 1 korrik të vitit të kaluar, po në Batincë. Edhe atëherë, autoritetet nuk arritën të siguronin prova të mjaftueshme për ta ndalur.
Sipas informacioneve paraprake, motivet e kësaj vrasjeje besohet të jenë familjare: Xhaviti thuhet se kishte kërkuar për martesë vajzën e Muharremit dhe ishte refuzuar – refuzim që mendohet se ka sjellë aktin fatal. Vajza e viktimës ka raportuar pranimin e mesazheve kërcënuese nga i dyshuari, ndonëse ai ndodhet në arrati.
Në momentin e vrasjes, Muharremi ndodhej jashtë orarit të punës dhe pa uniformë ushtarake. Ai ishte i shoqëruar nga një tjetër person, ndërsa hetuesit po shqyrtojnë mundësinë që autori të jetë ndihmuar nga dikush për të ndjekur dhe goditur viktimën.
Autoritetet kanë intensifikuar kërkimet, por për momentin – autori i dyshuar lëviz i lirë. Frika, zemërimi dhe tensioni janë rritur në komunitet, ndërsa publiku pret veprim të shpejtë dhe vendimtar nga institucionet.
