Drejtori i Spitalit të Tetovës, Agim Berisha ka demantuar fuqishëm pretendimet e disa medieve të caktuara se ka bërë keqpërdorim të mjeteve financiare për nevoja personale.
Sipas komunikatës së lëshuar nga Spitali Klinik i Tetovës, argumentohet se këto pretendime janë të rrejshme dhe krejtësisht të pabazuara.
Ja dhe komunikata e plotë:
Në lidhje me pretendimet e publikuara nga disa media mbi supozimet për keqpërdorim të mjeteve financiare të Institucionit për nevoja personale nga ana e drejtorit medicinal, z. Agim Berisha, dëshirojmë të sqarojmë opinionin publik se këto pretendime nuk qëndrojnë dhe janë krejtësisht të pabazuara.
Institucioni ynë është i përkushtuar ndaj transparencës dhe respektimit të standardeve më të larta të menaxhimit financiar dhe etikës profesionale. Për këtë arsye, ndiejmë nevojën të sqarojmë opinionin publik mbi mënyrën se si janë administruar fondet në lidhje me pagesën e një gjobe të shqiptuar ndaj drejtorit të Spitalit Klinik.
Me një akt të brendshëm të aprovuar nga sektori i financave në kuadër të IPSh Spitali Klinik Tetovë, është marrë vendim që pagesa e gjobës së shqiptuar ndaj personit përgjegjës, drejtorit të Spitalit Klinik, të kryhet fillimisht nga mjetet e institucionit. Megjithatë, kjo pagesë nuk përbën një përfitim personal apo keqpërdorim të fondeve publike, pasi shuma e paguar do të zbritet automatikisht nga paga e drejtorit në pagën e ardhshme, duke siguruar që institucioni të mos dëmtohet financiarisht në asnjë mënyrë.
Ky veprim është marrë në përputhje me rregulloret dhe procedurat e brendshme administrative, me qëllim që të sigurohet një menaxhim korrekt dhe transparent i situatës. IPSh Spitali Klinik Tetovë mbetet i hapur për çdo shqyrtim apo verifikim nga organet kompetente dhe është i përkushtuar për të garantuar integritetin dhe llogaridhënien në menaxhimin e burimeve financiare të institucionit.
Apelojmë tek mediat dhe opinioni publik që të mos bien pre e keqinformimeve dhe spekulimeve të pabaza, të cilat dëmtojnë reputacionin e institucionit dhe të punonjësve të tij. Ne mbetemi të hapur për çdo pyetje apo kërkesë për informacione shtesë dhe sigurojmë qytetarët se Spitali Klinik Tetovë do të vazhdojë të operojë me përgjegjësi dhe transparencë të plotë.
