Një rast tronditës ka dalë në dritë në shtetin e Ohajos, ku autoritetet zbuluan 16 fëmijë që dyshohet se ishin mbajtur të izoluar për vite me radhë në kushte çnjerëzore brenda një shtëpie.
Sipas hetimeve, fëmijët, të moshës nga 18 muaj deri në 18 vjeç, jetonin në një dhomë të vogël, pa kontakt me botën e jashtme. Shumica nuk ndiqnin shkollën, ndërsa disa prej tyre kishin vështirësi edhe në komunikim.
Policia ndërhyri pas një hetimi tjetër në banesë dhe gjeti fëmijët në gjendje të rëndë. Shtatë prej tyre u dërguan menjëherë në spital për trajtim mjekësor, ndërsa njëri ishte në gjendje kritike.
Në pranga kanë përfunduar katër anëtarë të familjes – prindërit dhe gjyshërit e fëmijëve – të cilët përballen me akuza që lidhen me rrezikimin dhe neglizhimin e të miturve. Të dyshuarit i kanë mohuar akuzat në seancën e parë gjyqësore.
Hetuesit po përpiqen të kuptojnë se si një situatë e tillë ka mbetur e pazbuluar për kaq gjatë, ndërsa rasti ka shkaktuar reagime të forta në opinionin publik dhe ka ngritur pikëpyetje mbi funksionimin e mekanizmave të mbrojtjes së fëmijëve në SHBA.
Autoritetet kanë nisur kujdesin dhe rehabilitimin për të gjithë fëmijët, ndërsa hetimet për rastin vazhdojnë.
