Evropa mund të mos arrijë objektivin për mbushjen e depozitave të gazit natyror në mbi 80 për qind të kapacitetit para fillimit të sezonit dimëror të ngrohjes, për shkak të konkurrencës gjithnjë e më të fortë globale për furnizim me gaz natyror të lëngshëm (LNG).
Paralajmërimi vjen nga drejtori ekzekutiv i kompanisë norvegjeze Equinor, Anders Opedal, i cili, sipas Reuters, deklaroi se rezervat aktuale të gazit në Evropë janë dukshëm nën mesataren e pesë viteve të fundit.
Aktualisht, depot evropiane janë të mbushura vetëm 54 për qind, niveli i dytë më i ulët për këtë periudhë të vitit në 15 vitet e fundit.
“Ne nuk besojmë se Evropa do të arrijë t’i mbushë depot me më shumë se 80 për qind deri në vjeshtë”, tha Opedal, duke paralajmëruar se rezervat e ulëta do ta bëjnë kontinentin më të ndjeshëm ndaj luhatjeve të çmimeve dhe ndërprerjeve të mundshme të furnizimit gjatë dimrit.
Sipas tij, arsyeja kryesore është situata e tensionuar në tregun global të LNG-së. Evropa siguron rreth 30 për qind të importeve të gazit përmes gazit natyror të lëngshëm, ndërsa tensionet në Lindjen e Mesme dhe konflikti mes SHBA-së dhe Iranit kanë ndikuar në qarkullimin detar në Ngushticën e Hormuzit, një nga korridoret më të rëndësishme të transportit të energjisë në botë.
Për pasojë, blerësit aziatikë po sigurojnë gjithnjë e më shumë dërgesa të LNG-së që, në kushte normale, do të furnizonin tregun evropian.
Analistët vlerësojnë se importet e LNG-së në Azi gjatë muajit korrik kanë arritur nivelin më të lartë në gjashtë muajt e fundit, ndërsa importet në Evropë mund të bien në nivelin më të ulët që nga shtatori i vitit 2024.
Në të njëjtën kohë, Bashkimi Evropian po vazhdon përpjekjet për të kufizuar të ardhurat e Rusisë nga eksporti i energjisë. Komisioni Evropian ka konfirmuar marrëveshjen për paketën e 21-të të sanksioneve ndaj Moskës.
Masat e reja u japin shteteve anëtare të BE-së mundësinë të konfiskojnë dhe të shesin naftën bruto dhe mallra të tjera të sekuestruara nga e ashtuquajtura “flotë në hije” e Rusisë, e cila përdoret për të shmangur kufizimet ndërkombëtare mbi eksportin e naftës.
Paketa përfshin gjithashtu ngrirjen e kufirit maksimal të çmimit të naftës ruse në 44 dollarë për fuçi për 12 muajt e ardhshëm, duke penguar rritjen e tij në 58 dollarë për fuçi.
