Sekretari i përgjithshëm i Alternativës, Zeqirija Ibrahimi, në një reagim të publikuar sot në rrjetin social facebook, ka shprehur shqetësimin e tij nga fotoja e publikuar ditë më parë ku shihej se si një hoxhë ia puthte dorën kandidatit presidencial të Frontit Europian. Për më shumë, lexojeni postimin e plotë!

Puthadorizmi si dukuri

Pamja e hoxhës që ia puth dorën politikanit të pushtetit duhet të shihet përtej emrave të përveçëm dhe, madje, edhe përtej fushatës zgjedhore.
Ajo duhet kundruar si dramë mes përfaqësuesit të pushtetit qiellor dhe atij të pushtetit tokësor ose, me terma konkretë, kjo është një dramë mes ulemave (klerit) me çallmë dhe pushtetit politik, që flet më shumë për gjendjen e përgjithshme të këtyre roleve në shoqërinë tonë.

Në të vërtetë, puthadorizmi nuk flet keq vetëm për ata që e puthin dorën e pushtetit, por më keq flet për pushtetarët që lejojnë që hoxha (kleri) t’ua puthë dorën dhe, duke e publikuar atë çast, krekosen me atë pamje të pështirë.

Kur politikanët dikur ua puthnin dorën hoxhallarëve, kjo nënkuptonte respekt për dijen, moralin dhe përshpirtshmërinë e hoxhallarëve. Figurativisht, ashtu pushteti tokësor i nënshtrohej pushtetit qiellor.
Kur hoxhallarët sot ua puthin dorën politikanëve, kjo flet për servilizmin e hoxhallarëve ndaj pushtetit. Figurativisht, ashtu pushteti qiellor i nënshtrohet pushtetit tokësor.
Kur politikanët lejojnë që hoxhallarët t’ua puthin dorën, kjo flet për kulmin e arrogancës dhe prepotencës nga pushteti që i ka dehur. Figurativisht, ashtu shfaqet dukuria e faraonizmit – kur pushteti i thotë vetes se “unë jam zoti”.
Kur politikani i pushtetit lejon që hoxha t’ia puthë dorën, kjo është mesazh se ai e ka nënshtruar ose synon ta nënshtrojë klasën e ulemave (hoxhallarëve) ndaj pushtetit të tij. Figurativisht, ai është mesazh se pushteti politik e ka nënshtruar shpirtin e njeriut, madje edhe pushtetin qiellor.

Natyrisht, puthadorizmi nuk shprehet vetëm fizikisht – kur dikush ia puth dorën dikujt, por ka edhe trajta të tjera, që fizikisht manifestohen ndryshe, por që e kanë kuptimin e njëjtë.

Kur këto role janë përmbysur, është fare lehtë ta kuptojmë se pse jeta jonë është e përmbysur për më shumë se dy dekada.