Është anuluar konkursi për punësimin e 1 117 punonjësve shëndetësorë. Konkursi i dedikohej personave mjekësorë të cilët janë ose kanë qenë të angazhuar me kontratë në vepër.

Zëvendësministrja shtesë e Financave Elena Petrova nga radhët e VMRO-DPMNE-së tha se ky është “mashtrim politik” dhe lojë me fatin e këtyre njerëzve.

“Nëse organet e shëndetësisë dhe të gjithë ministrat e shëndetësisë do të ishin të ndershëm dhe të drejtë, do ta kishin zgjidhur kohë më parë statusin e punësimit të punonjësve shëndetësorë, duke mos i lënë me vite si ‘kontraktorë”, deklaroi Petrova.

Ajo informoi se për anulimin e këtij konkursi i kanë informuar përfaqësuesit e sindikatave Bobi Bojçevski, kooridnatorin nacional në Sindikatën e pavarur për punëtorë shëndetësorë, Goce Dellçev-Todev dhe Marjan Risteskin nga Konfederata e organizatave sindikale në Maqedoni.

Sipas saj, kjo rrjedh nga informacionet që ajo publikoi më herët, se në Buxhetin e vitit 2024 nuk parashihen mjete për pagën bruto të 1 117 punëtorëve shëndetësorë.

Nga ana tjetër, heshtje nga Qeveria, gjegjësisht nga kryeministri teknik Talat Xhaferi, nga i pari i financave gjegjësisht ministri Fatmir Besimi dhe ministri i shëndetësisë, Ilir Demiri.

Në dhjetor të vitit 2023 ish ministri i shëndetësisë Fatmir Mexhiti, pati njoftuar se është miratuar punësimi i përhershëm për 1 117 persona të angazhuar në shëndetësinë publike. “Po zgjidhet statusi i 1.117 personave, personel mjekësor, personelit ndihmës-teknik, higjienistëve dhe vozitësve dhe me vendim të Qeverisë hapet mundësi për punësim me kohë të pacaktuar në institucionet shëndetësore publike”, deklaroi aso kohe Mexhiti. Për këto punësime kishin përcjellur mesazhe edhe kryeministri Dimitar Kovaçevski, zëvendëskryeministri Artan Grubi dhe ministri i financave, Fatmir Besimi. (INA)