Kompanitë ajrore nuk do të jenë të detyruara të paguajnë dëmshpërblim për pasagjerët nëse një fluturim anulohet për shkak të mungesës së përkohshme të karburantit në aeroportin përkatës. Kjo parashikohet në draft-udhëzimet e Komisionit Evropian, të hartuara për të përballuar situatën aktuale gjeopolitike që ka ndërprerë furnizimet me karburant aviacioni nga Gjiri Persik.
Sipas Komisionit Evropian, mungesa “lokale” e karburantit mund të konsiderohet “rrethanë e jashtëzakonshme”, çka do t’i përjashtonte kompanitë nga pagesa e kompensimit prej 250 deri në 600 euro për pasagjer, në varësi të distancës së fluturimit të anuluar. Rimbursimi i biletës mbetet gjithsesi i detyrueshëm. Sipas ekspertëve të sektorit, mjafton edhe publikimi i një “Notam”-i, njoftimi zyrtar për aeronavigueshmërinë, për të justifikuar situatën.
Në një tjetër pjesë të draftit, që ende mund të ndryshojë, Komisioni sqaron se kompanitë ajrore nuk mund të rrisin në mënyrë retroaktive çmimin e biletave të blera më parë për të kompensuar rritjen e kostove të karburantit, të cilat pothuajse janë dyfishuar krahasuar me fundin e muajit shkurt.
Për paketat turistike, Brukseli rikujton se organizatorët mund të rrisin çmimin deri në 8% për shkak të shtimit të kostove të karburantit, por vetëm nëse udhëtari informohet të paktën 20 ditë para nisjes.
Komisioni Evropian vlerëson se situata e përgjithshme mbetet aktualisht stabile dhe nuk ka prova konkrete për mungesë karburanti. Megjithatë, paralajmëron se një zgjatje e konfliktit mund të shkaktojë ndërprerje në furnizime, veçanërisht për karburantin e avionëve. Për këtë arsye, Brukseli nënvizon se nuk ekziston ndalim për përdorimin e karburantit amerikan Jet A, i cili ndryshon lehtë nga standardi ndërkombëtar Jet A1.
Komisioni nuk parashikon asnjë fleksibilitet për rregullat mbi slot-et aeroportuale, të drejtat për ngritje dhe ulje. Linjat ajrore duhet të përdorin të paktën 80% të çifteve të slot-eve të caktuara, edhe nëse çmimet rekord të karburantit e bëjnë operimin më pak fitimprurës.
Brukseli shton se situata mbetet në zhvillim dhe se, nëse kriza përshkallëzohet drejt një mungese reale karburanti, mund të shqyrtohen masa të tjera për të garantuar vazhdimësinë operative të kompanive dhe funksionimin normal të zinxhirëve të furnizimit në Bashkimin Evropian.
