Është koha e fundit që liqeni i mirënjohur “Treska” në Saraj të trajtohet ashtu siç e meriton. Liqeni i Treskës, dikur vendi kult i shkupjanëve prej dekadash është lënë në mëshirë të kohës dhe njoftimi se do të ketë investime së shpejti është një nga lajmet më të mira që i kanë pritur qytetarët e kryeqytetit.
Edhe pse disa herë janë paralajmëruar projekte të ndryshme, pritet që më në fund të nisë procedura për kërkimin e një investitori potencial që do të ofrojë projekt zhvillimor për këtë qendër sportive-rekreative.
Sipas informacioneve jozyrtare nga Qeveria, përgatitja e procedurës është në fazën përfundimtare, pas së cilës zyrtarisht do të fillojë edhe procedura vijuese.
Liqeni i Treskës është nën ingerencat e Ministria e Kulturës dhe Turizmit, ndërsa sipas informacioneve të caktuara, disa investitorë kanë shprehur interes fillestar për investim dhe janë realizuar disa takime, shkruan “Zhurnal.mk”. përcjell Zhurnal.mk .
Disa kompani kanë shprehur interes parimor, ndërsa mes tyre edhe biznesmeni Samir Mane, i cili së bashku me ekipin e tij ka zhvilluar takim me përfaqësues të Qeverisë, ku ka shprehur interes për investime në projekte të ndryshme.
Ajo çfarë është shumë e rëndësishme në këtë moment është fakti se Maqedonia e Veriut i duhen investitorë seriozë dhe afatgjatë, pasi vendi zakonisht është përballur me sfida për të mbajtur kapitalin e huaj dhe për të realizuar projektet infrastrukturore në afatet e caktuara.
Për të përmirësuar këtë situatë dhe për të tërhequr partnerë që garantojnë përmbushjen e kontratave, shteti duhet të krijojë kushte më të favorshme dhe përmirësimin e efikasitetit në sektorin publik.
Fokus kryesor për realizimin e projekteve në kohë është përmirësimi i infrastrukturës, ku qeveria duhet të ndërmarrë nisma për të zhbllokuar dhe përshpejtuar projektet kapitale, në mesin e të cilave është edhe Liqeni Treska. përcjell Zhurnal.mk .
Qeveria duhet të ofrojë mbështetje institucionale, shërbime kujdesi për kompanitë dhe lehtësime administrative.
Maqedonia e Veriut duhet që mos t’i lëshojë nga dora investitorët seriozë, të cilët kanë vizion të qartë për zhvillim ekonomik, kanë dëshmuar në të kaluarën se dinë dhe munden të ndërtojnë me cilësi bashkëkohore, shkruan “Zhurnal.mk”.
Ajo që është shumë me rëndësi është fakti se Liqeni i Treskës do të jetë një vlerë e shtuar dhe një margaritar i ri në turizmin e kryeqytetit. Fatkeqësisht, Shkupi nuk ka shumë pika ku turistët mund të vizitojnë. Përveç Çarshia e Vjetër e Shkupit dhe Kanioni i Matkës, në Shkup pothuajse nuk ka çfarë të vizitojnë turistët.
Me ndërtimin dhe kthimin e shkëlqimit të Liqenit Treska, Shkupi do të shndërrohet në një prej atraksioneve më të çmuara turistike në rajon, prandaj është shumë e rëndësishme që investitorëve që janë të interesuar për Liqenin e Treskës t’iu ofrohen të gjitha lehtësirat dhe kapacitetet e nevojshme që procesi të zhvillohet pa asnjë pengesë.
Ky projekt nuk do të ketë rëndësi vetëm për turizmin, por edhe për cilësinë e jetës në kryeqytet. Një kompleks modern rekreativ rreth liqenit do t’u ofronte qytetarëve hapësira të reja për sport, ecje, çiklizëm, aktivitete familjare dhe organizime kulturore e sportive. Në një kohë kur qytetarët e Shkupit përballen me mungesë të hapësirave publike cilësore dhe me ndotje të lartë, revitalizimi i Liqenit Treska do të sillte edhe një dimension ekologjik dhe shëndetësor për gjithë zonën. përcjell Zhurnal.mk .
Një projekt modern në këtë zonë do të rriste ndjeshëm edhe kapacitetin turistik të kryeqytetit, duke krijuar mundësi për zhvillimin e hotelerisë, gastronomisë, sporteve ujore, turizmit fundjavor dhe organizimit të festivaleve apo ngjarjeve ndërkombëtare. Liqeni Treska mund të shndërrohet në një qendër të re ekonomike dhe turistike, e cila do të tërheqë vizitorë jo vetëm nga vendi, por edhe nga rajoni.
Përfitimet ekonomike do të jenë shumëdimensionale. Përveç rritjes së numrit të vendeve të punës gjatë fazës së ndërtimit dhe funksionimit, do të aktivizohen dhjetëra sektorë ekonomikë si ndërtimtaria, transporti, hoteleria, tregtia, shërbimet dhe teknologjia. Hapja e bizneseve të reja përreth liqenit do të krijonte mundësi të reja për të rinjtë dhe sipërmarrësit lokalë.
Gjithashtu, zhvillimi i Liqenit Treska do të ndikonte drejtpërdrejt në rritjen e vlerës së pronave në zonën e Saraj dhe vendbanimeve përreth, duke e bërë këtë pjesë të Shkupit më atraktive për banim dhe investime. Një projekt i tillë do të nxiste edhe investime të tjera plotësuese në infrastrukturë, rrugë, ndriçim, kanalizim dhe transport publik.
Me zhvillimin e këtij projekti përveç që do të përfitojnë qytetarët vende për argëtim dhe pushim, do të përfitojë edhe Komuna e Sarajit dhe vendbanimet përreth, pronat e të cilëve do të kenë vlerë të shtuar, do të ketë më shumë oferta për punë dhe të ardhura më të mira për të gjithë zonën.
Çdo investim kapital duhet parë si një zinxhir investimesh ku përfitojnë kompani dhe biznese të ndryshme nga logjistika, furnizimi, kryerja e punimeve, mirëmbajtja, pastrimi e deri te të ardhurat shtesë për komunën, shkruan “Zhurnal.mk”.
Edhe kryetari i komunës së Sarajit, Muhamed Elmazi në emisionin “Dialog te Lajmi” deklaroi “Samir Mane është njëri nga pretendët kryesorë, të cilët duan të bëjnë investim dhe ta riaktivizojnë liqenin e “Treskës”.
Sipas tij, në një takim na është prezantuar si e parashikon zhvillimin kompania “Samir Mane” dhe për sa vite mund ta ndërtojë Liqenin e Treskës dhe për sa vite mund ta vë në funksion dhe janë duke u realizuar procedurat administrative, ku do të përputhet ideja me procedurat ligjore.
“Mane është i gatshëm të bëjë mrekulli që i bën në vende tjera dhe një të tillë ta sjellë në komunën e Sarajit, që është investim mbi 100 milion euro”, bëri të ditur kryetari i komunës së Sarajit, Muhamed Elmazi.
Nëse projekti realizohet me standarde moderne dhe me vizion afatgjatë, Liqeni Treska mund të bëhet simbol i ri i zhvillimit urban dhe turistik të Shkupit, një destinacion që do ta ndryshojë imazhin e kryeqytetit dhe do ta pozicionojë atë më denjësisht në hartën turistike të rajonit. përcjell Zhurnal.mk .
