Një tërmet i pazakontë ka goditur pasditen e së martës Danimarkën, duke shkaktuar shqetësim dhe surprizë mes banorëve të Kopenhagës dhe zonës përreth, në një vend ku aktiviteti sizmik konsiderohet jashtëzakonisht i rrallë.
Sipas Qendrës Evropiane Sizmologjike, lëkundja me magnitudë mes 3.5 dhe 3.9 u regjistrua në orën 14:14 UTC, me epiqendër në det, rreth 30 kilometra në jug të Kopenhagës, pranë zonës Solrød Strand dhe në juglindje të qytetit Greve.
Tërmeti kishte një thellësi rreth 10 kilometra dhe u ndje qartë në disa zona të kryeqytetit danez, ku banorët raportuan dridhje të ndërtesave, lëvizje të lehta të dritareve dhe vibrime të papritura.
Në rrjetet sociale u publikuan dhjetëra reagime nga qytetarët që përshkruanin momentin e lëkundjes, ndërsa autoritetet lokale konfirmuan se nuk ka raportime për dëme apo persona të lënduar.
Instituti Gjeologjik Danez dhe Groenlandez (GEUS) njoftoi se po monitoron situatën dhe po analizon mundësinë e lëkundjeve të tjera pasuese.
Ngjarja konsiderohet statistikisht shumë e rrallë për Danimarkën. Sipas të dhënave historike të observatorit “VolcanoDiscovery”, vendi regjistron mesatarisht më pak se një tërmet të kësaj magnitude çdo dy vite e gjysmë. Që nga viti 1900, në territorin danez janë regjistruar vetëm gjashtë tërmete me magnitudë 4 ose më të lartë.
Rëndësia e lëkundjes lidhet edhe me afërsinë me Kopenhagën, një kryeqytet me mbi një milion banorë, ku ndërtesat nuk janë projektuar sipas standardeve antisizmike të vendeve me rrezik të lartë sizmik.
Eksperti meteorologjik Jens Ringgård deklaroi për televizionin TV2 se fenomeni lidhet me lëvizjet e pllakës euroaziatike, ku ndodhet Danimarka. Ai shtoi se një nga shkaqet e mundshme mund të jetë edhe ndikimi gjeologjik i lënë nga epoka e fundit akullnajore në territorin skandinav.
