Një video që filloi të përhapet me shpejtësi në rrjetet sociale ka shkaktuar një stuhi reagimesh në publik, pasi pamjet tregojnë një grua duke marrë një kuti me donacione të vendosur në një arkë në një supermarket. Sipas informacionit të publikuar së bashku me videon, kutia kishte për qëllim mbledhjen e ndihmave për një fëmijë, dhe e gjithë ngjarja është regjistruar nga kamerat e sigurisë në objekt. Në pamjet filmike, shihet se si gruaja në një moment merr kutinë dhe largohet, ndërsa punonjësit dhe të pranishmit në supermarket me sa duket nuk e vënë re se çfarë po ndodh në atë moment. Rasti ka shkaktuar një revoltë të madhe tek qytetarët në rrjetet sociale, veçanërisht sepse bëhet fjalë për donacione të destinuara për të ndihmuar një fëmijë.
Deri më tani, nuk ka asnjë informacion zyrtar në cilin supermarket ka ndodhur incidenti, as nëse rasti është raportuar në polici. Gjithashtu nuk dihet nëse gruaja është identifikuar apo gjetur. Sipas datës së treguar në pamjet e sigurisë, ngjarja ka ndodhur dje, pra më 7 maj 2026. Videoja vazhdon të shpërndahet në rrjetet sociale dhe shumë njerëz po u bëjnë thirrje institucioneve kompetente që ta zbardhin çështjen sa më shpejt të jetë e mundur.
