Shefi i Ushtrisë së Pakistanit, Asim Munir, është nisur drejt Teheranit në kuadër të përpjekjeve diplomatike për të ndërmjetësuar një marrëveshje mes Shteteve të Bashkuara dhe Iranit, për t’i dhënë fund konfliktit dhe tensioneve të fundit rajonale.
Lajmi është raportuar fillimisht nga gazetari i Axios Barak Ravid, duke cituar një burim pakistanez të sigurisë. Raportime të tjera ndërkombëtare konfirmojnë se Pakistani ka marrë rol aktiv ndërmjetësues në kontaktet mes Washingtonit dhe Teheranit gjatë javëve të fundit.
Sipas mediave ndërkombëtare, diskutimet lidhen me një marrëveshje të përkohshme që synon shmangien e rifillimit të luftës, rihapjen e plotë të Ngushticës së Hormuzit dhe krijimin e kushteve për negociata të reja mbi programin bërthamor iranian.
Pakistani është shfaqur muajt e fundit si një kanal i rëndësishëm komunikimi mes palëve, me vizita dhe kontakte të vazhdueshme diplomatike në Teheran, Washington dhe vendet e Gjirit.
Megjithatë, deri tani nuk ka konfirmim zyrtar nga Shtëpia e Bardhë apo autoritetet iraniane për një marrëveshje përfundimtare ose për rezultatet konkrete të misionit të Munir në Teheran.
Një rrjet mediatik saudit ndërkohë ka publikuar atë që e cilëson si “draftin final” të një marrëveshjeje të mundshme mes Shteteve të Bashkuara dhe Iranit për t’i dhënë fund luftës, duke pretenduar se ajo mund të shpallet “brenda pak orësh”, ndonëse ende nuk është miratuar nga të dyja palët.
Sipas raportimit të Al-Arabiya, marrëveshja e ndërmjetësuar nga Pakistani përshkruhet si një akord i përkohshëm, ndërsa disa çështje të pazgjidhura do të negociohen pasi ajo të hyjë në fuqi.
Raporti, që citon burime të paidentifikuara, thekson se marrëveshja do të hyjë në fuqi menjëherë sapo të shpallet zyrtarisht nga të dyja palët.
Megjithatë, drafti i publikuar nuk përfshin qartë disa nga kërkesat kyçe të Shteteve të Bashkuara ndaj Iranit, përfshirë çmontimin e programit bërthamor iranian, eksportimin e rezervave të uraniumit të pasuruar në nivelin 60%, kufizimin e raketave balistike dhe ndërprerjen e mbështetjes për grupet e armatosura aleate të Teheranit në rajon.
Dokumenti parashikon që negociatat për “çështjet e mbetura pezull” të nisin brenda shtatë ditëve nga hyrja në fuqi e marrëveshjes. Po ashtu, lehtësimi gradual i sanksioneve amerikane do të kushtëzohet me angazhimin e Iranit ndaj kushteve të marrëveshjes, megjithëse drafti nuk specifikon se çfarë ndodh nëse çështjet e pazgjidhura nuk adresohen.
Sipas raportimit të medias saudite, marrëveshja me nëntë pika përfshin:
- armëpushim të menjëhershëm, gjithëpërfshirës dhe pa kushte në tokë, det dhe ajër;
- angazhim të ndërsjellë për të mos goditur objektiva ushtarake, civile apo infrastrukturë ekonomike;
- ndalimin e operacioneve ushtarake dhe të ashtuquajturës “luftë mediatike”;
- respektimin e sovranitetit, integritetit territorial dhe mosndërhyrjes në punët e brendshme;
- garantimin e lirisë së lundrimit në Gjirin Arabik, Ngushticën e Hormuzit dhe Gjirin e Omanit;
- krijimin e një mekanizmi të përbashkët për monitorimin e zbatimit dhe zgjidhjen e mosmarrëveshjeve;
- nisjen e negociatave për çështjet e mbetura brenda shtatë ditëve;
- heqjen graduale të sanksioneve amerikane në këmbim të respektimit të marrëveshjes nga Irani;
- riafirmimin e respektimit të së drejtës ndërkombëtare dhe Kartës së Kombeve të Bashkuara.
Pavarësisht pretendimeve për një njoftim të afërt, marrëveshja mbetet ende “në pritje të miratimit” nga Shtetet e Bashkuara dhe Irani, çka lë të paqartë nëse drafti do të përkthehet në një marrëveshje zyrtare.
