Ish-oficeri i policisë britanike, Martin Anstee, ndodhet në izolim në spital pasi u evakuua nga anija turistike MV Hondius, në kuadër të një shpërthimi të dyshuar me hantavirus.
Anstee, 56 vjeç, i cili punonte si udhërrëfyes ekspedite dhe ka shërbyer më herët si oficer policie, u transportua të mërkurën në një spital në Holandë së bashku me dy persona të tjerë.
Ai ka deklaruar për mediat se është në gjendje të mirë, por ndodhet nën monitorim mjekësor dhe në izolim, ndërsa i nënshtrohet analizave të shumta për të përcaktuar gjendjen e saktë shëndetësore. Sipas tij, ende nuk dihet sa do të zgjasë qëndrimi në spital.
“Jam në izolim për momentin dhe nuk e di sa do të zgjasë,” është shprehur ai, duke shtuar se mjekët do të kenë një pamje më të qartë në ditët në vijim.
Sipas Organizatës Botërore të Shëndetësisë, deri tani janë konfirmuar disa raste të infeksionit dhe tre persona kanë humbur jetën, ndërsa të tjerë janë nën monitorim ose vetëizolim.
Agjencia e Sigurisë Shëndetësore e Mbretërisë së Bashkuar (UKHSA) ka deklaruar se izolimi mund të zgjasë deri në disa javë pas ekspozimit, por thekson se rreziku për publikun mbetet i ulët.
Ekspertët e OBSH-së kanë nënvizuar se situata nuk konsiderohet një shpërthim i ngjashëm me COVID-19, duke ulur shqetësimet për përhapje masive.
Hetimet paraprake sugjerojnë se infeksioni mund të ketë ardhur nga ekspozimi ndaj brejtësve në një zonë mbeturinash në Ushuaia, gjatë një ekskursioni për vëzhgim shpendësh nga disa pasagjerë të anijes.
Autoritetet shëndetësore po vijojnë hetimet për të përcaktuar burimin e saktë të shpërthimit dhe për të monitoruar të gjithë personat e ekspozuar.
