Reshjet e dendura të shiut kanë shkaktuar përmbytje të mëdha në Stamboll, duke çuar në vdekjen e një djali 14-vjeçar, i cili humbi jetën nga goditja elektrike ndërsa ndodhej në ujërat e përmbytjes. Në qytetin me rreth 16 milionë banorë, janë regjistruar më shumë se 1.200 raste përmbytjesh dhe 15 rrëshqitje dheu, si dhe dhjetëra incidente ku njerëzit mbetën të bllokuar nga rritja e nivelit të ujit.
Djali, i identifikuar me inicialet M. I., humbi jetën pasi shkeli në një pellg uji në parkun “Çukurbostan”, që ndodhet në lagjen Balat të distriktit Fatih në Stamboll. Sipas Zyrës së Guvernatorit të Stambollit, djali u dërgua në spital pa ndjenja, por ndërroi jetë pavarësisht përpjekjeve të mjekëve për t’i shpëtuar jetën.
Autoritetet kanë nisur një hetim lidhur me ngjarjen.
