Një video e re e publikuar nga Departamenti Amerikan i Mbrojtjes ka ngjallur debate të forta, pasi disa ekspertë e interpretojnë si momentin kur një objekt fluturues i paidentifikuar (UFO/UAP) është goditur nga Forcat Ajrore të SHBA-së.
Sipas mediave amerikane, përfshirë TMZ, videoja dyshohet se lidhet me një incident të shkurtit 2023 mbi Liqenin Huron, ku shihet një objekt i paidentifikuar që shfaqet në fushën e shikimit të një avioni F-16C dhe më pas zhduket pas një ndërhyrjeje.
Sipas Zyrës për Zgjidhjen e Anomalive në të Gjitha Zonat (AARO), materiali filmik “ka të ngjarë të jetë regjistruar nga një sensor infra të kuq i një platforme ushtarake amerikane”.
Pamjet janë pjesë e një pakete të re prej 222 dosjesh të publikuara nga Pentagoni, që përfshijnë dokumente, fotografi dhe video të ndryshme mbi fenomene ajrore të paidentifikuara.
Megjithatë, Departamenti Amerikan i Mbrojtjes ka theksuar se përshkrimet e materialeve janë vetëm për qëllime informuese dhe nuk përbëjnë konkluzione zyrtare.
“Lexuesit nuk duhet ta interpretojnë këtë si gjetje faktike mbi natyrën apo vlefshmërinë e ngjarjes”, thuhet në deklaratën shoqëruese të Pentagonit.
