Situata e sigurisë në Lindjen e Mesme është përshkallëzuar më tej, pasi disa shpërthime të forta janë raportuar në jug të Iranit, ndërsa incidente të reja janë regjistruar edhe në Kuvajt.
Sipas agjencisë shtetërore iraniane Fars, shpërthimet janë dëgjuar në lindje të qytetit portual Bandar Abbas dhe në zonën bregdetare të ishullit Qeshm, pranë Ngushticës strategjike të Hormuzit.
Më pas, agjencia shtetërore IRNA raportoi se raketa të lëshuara nga ajo që e cilëson si “armiku” goditën ishullin Qeshm. Guvernatori i Qeshmit, Hossein Amir Teymouri, deklaroi se 10 deri në 11 predha kishin shënjestruar zonën ushtarake të ishullit, duke shtuar se nuk ka raportime për viktima.
Ndërkohë, media amerikane Axios, duke cituar një zyrtar të lartë amerikan, raportoi se ushtria e Shteteve të Bashkuara kreu rreth një orë më parë sulme ndaj sistemeve iraniane të mbrojtjes raketore dhe ajrore. Sipas të njëjtit burim, operacioni u përqendrua edhe ndaj anijeve të vogla të lidhura me Trupat e Gardës Revolucionare Islamike të Iranit (IRGC) pranë Ngushticës së Hormuzit. Deri tani, autoritetet amerikane nuk kanë publikuar një konfirmim zyrtar për këto pretendime.
Në një zhvillim tjetër, Kuvajti njoftoi se tre poste kufitare në veri të vendit janë dëmtuar nga ajo që Ministria e Mbrojtjes e përshkroi si një “sulm armiqësor dhe kriminal”. Gjithashtu, një platformë shpimi në det të hapur, brenda ujërave territoriale kuvajtiane, u godit nga një dron.
Sipas autoriteteve kuvajtiane, sulmet shkaktuan dëme materiale, ndërsa një punonjës i platformës mbeti i plagosur dhe po merr trajtim mjekësor.
Nga ana tjetër, agjencia iraniane Fars, duke cituar Gardën Revolucionare Islamike, raportoi se Irani kishte shënjestruar sistemet amerikane të lëshimit të raketave në Kuvajt. Këto zhvillime pasojnë deklaratat e Teheranit se kishte ndërmarrë sulme ndaj disa bazave ushtarake amerikane në rajonin e Gjirit, si përgjigje ndaj operacioneve të fundit ushtarake të SHBA-së.
Përballë përshkallëzimit të situatës, Pakistani shprehu “shqetësim të thellë” dhe u bëri thirrje të gjitha palëve të tregojnë përmbajtje. Në një deklaratë të Ministrisë së Jashtme të publikuar në platformën X, Islamabadi kërkoi ndërmarrjen e hapave të menjëhershëm për uljen e tensioneve dhe respektimin e angazhimeve të dakorduara më herët përmes dialogut.
“Pakistani mbetet i përkushtuar për të mbështetur çdo përpjekje që synon arritjen e paqes dhe stabilitetit të qëndrueshëm në rajon përmes dialogut dhe diplomacisë”,thuhet në deklaratë.
Situata mbetet dinamike dhe informacionet po përditësohen, ndërsa palët e përfshira vijojnë të publikojnë deklarata mbi zhvillimet në terren.
