Rritja e paralajmëruar e temperaturave ditore, e cila sipas meteorologëve në disa rajone do të arrijë deri në 40 gradë Celsius, rrit rrezikun për shfaqjen e helmimeve nga ushqimi, përcjell TV21. Temperaturat e larta paraqesin rrezik potencial edhe për shëndetin e kafshëve, nëse nuk merren me kohë masa për sigurimin e sasive të mjaftueshme të ushqimit të sigurt dhe ujit të pijshëm. Siç thonë nga Agjencia për Ushqim dhe Veterinari (AUV) për MIA-n, për të parandaluar helmimet nga ushqimi është e nevojshme të bëhet zgjedhje e kujdesshme gjatë blerjes, të sigurohet transporti i duhur dhe kushtet e përshtatshme për ruajtje, si dhe të kihet kujdes për pamjen, afatin e përdorimit dhe mënyrën e magazinimit të produkteve. Rekomandohet që ushqimi të blihet në vende të kontrolluara, ku produktet, veçanërisht ato që prishen lehtë me origjinë shtazore, ruhen në pajisje ftohëse.
Trending
