Jon Suloymeri, student i Mjekësisë me mesatare 10.0, i ka kthyer përgjigje kryeministrit Edi Rama, i cili e përfshiu logon dhe foton e tij në listën e 45 personave me precedentë penalë në protestë.
Rama e akuzoi studentin për “prodhim dhe shitje të lëndëve narkotike”.
Përmes një reagimi nga sheshi i protestës poshtë zyrës së kryeministrit, studenti i hodhi poshtë akuzat e kryeministrit si të trilluara:
“Zoti kryeministër më akuzoi për shitje droge, por unë jam student i Mjekësisë me mesatare 10.0. Këto janë përpjekjet e fundit të një diktatori, nuk na ndaloni dot me gënjeshtra.”
Suloymeri sqaroi se javën e kaluar u shoqërua nga policia për 7 orë e gjysmë dhe më pas u lëshua. Ai shtoi se nuk ka besim te drejtësia për të bërë denoncim.
Sa i përket pjesëmarrjes në protestë, studenti theksoi se po kërkon arsim më cilësor, duke denoncuar kushtet skandaloze në universitete:
* Infrastruktura: Godinat ku zhvillohet mësimi janë në gjendje mizerable.
* Pedagogët: Profesorët punojnë në disa vende pune njëkohësisht dhe nuk u njihen as fytyrat.
* Refuzimi i dialogut: Protestuesit nuk duan dialog me qeverinë, por dorëheqjen e Ramës dhe të opozitës.
Reagimi i studentit vjen pasi Kryeministri Rama pretendoi publikisht se protestat e studentëve po financohen nga krimi i organizuar dhe forca të huaja.
Komentet
Bëhu i pari që komenton.
