Deputetët e Aleancës për Shqiptarët, Bashkimit Demokratik për Integrim (BDI) dhe Lidhjes Socialdemokrate të Maqedonisë (LSDM) braktisën seancën parlamentare kushtuar rikonstruimit të Qeverisë, pas pauzës së dytë për koordinimin e grupeve parlamentare. Sipas opozitës, shkak për këtë ishte një incident në të cilin kandidati për ministër, Ivan Stoilkoviq, kishte përdorur gjuhë fyese ndaj deputetëve opozitarë.
Largimi nga salla plenare pasoi pas koordinimit parlamentar, ku deputetët e opozitës shprehën pakënaqësi pasi nuk morën një kërkimfalje publike nga Stoilkoviq dhe as një dënim të sjelljes së tij nga kryeministri.
Koordinatori i grupit parlamentar të LSDM-së, Oliver Spasovski, deklaroi se në koordinim kishin propozuar që kryetari i Kuvendit të dënonte publikisht sjelljen e kandidatit për ministër.
“Propozuam që të miratohej një përfundim me të cilin do të dënohej sjellja konkrete e kandidatit për ministër Ivan Stoilkoviq. Megjithatë, kryetari vendosi ta komunikojë këtë vetëm në emër të shumicës parlamentare, pa theksuar qartë se kujt i referohej problemi”, tha Spasovski.
Deputeti i Aleancës për Shqiptarët, Halil Snopçe, deklaroi se një pjesë e deputetëve të opozitës nuk ishin ftuar në koordinim dhe njoftoi se edhe grupi i tij do ta braktiste seancën.
“Kërkuam që kandidati për ministër Ivan Stoilkoviq t’u kërkojë falje publike deputetëve dhe më pas të vazhdojmë normalisht seancën. U mbajt koordinim, por për fat të keq kryetari nuk e pa të arsyeshme të na ftonte edhe neve. Meqenëse fyerjet e Stoilkoviqit ishin drejtuar ndaj të gjithë deputetëve të opozitës, ne nuk dimë se çfarë është dakorduar në atë koordinim”, tha Snopçe.
Ai shtoi se opozita nuk mund të garantonte se do të përmbahej nga reagimet nëse seanca do të vazhdonte pa një kërkimfalje publike.
“Nuk mund t’i qetësojmë tensionet në këtë mënyrë. Megjithatë, për të kontribuar në uljen e tyre, ne do ta lëshojmë seancën”, deklaroi ai.
Edhe deputetët e BDI-së reaguan, duke vlerësuar se Stoilkoviq kishte pasur sjellje të papranueshme ndaj opozitës dhe duke shprehur pakënaqësi që as kryeministri dhe as koordinatori i shumicës parlamentare nuk u distancuan nga incidenti.
Pas largimit të deputetëve të LSDM-së, BDI-së dhe Aleancës për Shqiptarët, fjalën e mori kryetari i Levicës, Dimitar Apasiev, i cili kritikoi sjelljen në seancë dhe ekspozenë e kryeministrit, duke e cilësuar atë si “një tekst të paketuar bukur, por steril dhe pa përmbajtje”.
Pas debatit dhe tensioneve në sallë, kryetari i Kuvendit, Afrim Gashi, shpalli një tjetër pauzë me kohëzgjatje prej një ore.
