Pika kufitare “Evzoni” në kufirin mes Maqedonisë dhe Greqisë po përballet me probleme serioze teknike pas një goditjeje nga rrufeja, e cila shkaktoi ndërprerje të energjisë elektrike dhe pengoi funksionimin e sistemeve kryesore.
Sipas informacioneve të fundit të publikuara nga mediat serbe, gjeneratorët aktualisht nuk po arrijnë të sigurojnë energji të mjaftueshme për funksionimin normal të të gjitha pajisjeve dhe shërbimeve në pikën kufitare.
Vështirësi shtesë janë shfaqur edhe për shkak të problemeve me lidhjen e internetit, kështu që edhe në zonat ku furnizimi me energji elektrike është stabilizuar, sistemet nuk funksionojnë me kapacitet të plotë.
Për shkak të kombinimit të ndërprerjeve të energjisë dhe problemeve në rrjetet e komunikimit, janë krijuar bllokime serioze dhe funksionim i vështirësuar në pikën kufitare, gjë që ka shkaktuar një kolaps të plotë në punën e shërbimeve kufitare.
Qytetarët që duhet ta kalojnë këtë pikë kufitare gjatë natës thonë se janë të shqetësuar për situatën, pasi nuk e dinë se çfarë i pret.
