Sëmundjet e zemrës dhe enëve të gjakut kanë qenë shkaktarë të 6.888 nga gjithsej 20.287 vdekjeve në Maqedoni gjatë vitit 2025. Me një pjesëmarrje prej 34 përqind te të dyja gjinitë, ato përbëjnë grupin më të madh të shkaqeve të vdekjeve, sipas të dhënave përfundimtare të Entit Shtetëror të Statistikave, transmeton Portalb.mk.
Të dhënat sipas gjinisë japin një pasqyrë më të qartë. Nga 10.498 burrat që kanë vdekur gjatë vitit 2025, te 3.354 prej tyre shkaku i vdekjes ka qenë sëmundja e sistemit të qarkullimit të gjakut. Kjo përbën rreth 32 përqind të të gjitha vdekjeve te burrat. Burrat përbënin 51,7 përqind të numrit të përgjithshëm të personave të vdekur në vend, nga të gjitha shkaqet.
Kontrolli parandalues mund të fillojë me matjen e tensionit të gjakut te mjeku amë. Sipas Organizatës Botërore të Shëndetësisë, shumica e njerëzve me tension të lartë nuk kanë simptoma. Një matje e vetme e ngritur zakonisht duhet të konfirmohet me matje të përsëritura. Për të vlerësuar rrezikun nga infarkti ose goditja në tru, mjeku merr parasysh tensionin e gjakut, kolesterolin, duhanpirjen dhe moshën, si dhe nëse pacienti ka diabet, sëmundje të veshkave ose ndonjë familjar të afërt që ka pësuar infarkt ose goditje në tru në moshë më të re. Nga ky vlerësim varet se cilat analiza kanë kuptim të bëhen dhe kur duhet të përsëriten.
Nëse mjeku amë vlerëson se nevojiten analiza laboratorike, Fondi për Sigurim Shëndetësor, ndër shërbimet që ofrohen me udhëzim, rendit matjen e glukozës në gjak, kolesterolin e përgjithshëm dhe trigliceridet. Personat e siguruar mund të zgjedhin laboratorin që ka marrëveshje me Fondin. Për këto shërbime vlejnë rregullat për bashkëpagesë.
Presioni ose shtrëngimi në gjoks që zgjat disa minuta ose përsëritet, veçanërisht nëse shoqërohet me vështirësi në frymëmarrje, djersë të ftohta ose dhimbje që përhapet drejt krahut apo nofullës, kërkon ndihmë urgjente. Rënia e papritur e njërës anë të fytyrës, dobësia e njërës dorë ose çrregullimi i të folurit janë shenja të një goditjeje të mundshme në tru. Në këto raste duhet të telefononi menjëherë numrin 112, edhe nëse simptomat zhduken.
Komentet
Bëhu i pari që komenton.












