Së fundmi, në disa media elektronike po qarkullon një lajm se deputetja e VV-së Edona Lalloshi i ka thënë kandidates për deputet në LDK-Adelina Thaçit “Ti jap unë do vota”.
Në reagim thuhet:
Të nderuar miq, kolegë dhe qytetarë,
Së fundmi, në disa media elektronike po qarkullon një lajm krejtësisht i rremë dhe dashakeq, ku pretendohet se unë i kam reaguar me koment mikës sime, Adelina Thaçit, me fjalët: “Ti jap unë do vota”.
Ndjej detyrim moral dhe profesional që të reagoj menjëherë për të kundërshtuar këtë shpifje të pastër, e cila nuk është aspak e vërtetë dhe synon të njollosë imazhin tim dhe marrëdhënien tonë korrekte e miqësore.
Përgjatë gjithë rrugëtimit tim, udhërrëfyes kam pasur gjithmonë respektin reciprok dhe etikën njerëzore e profesionale. Pavarësisht pozitave politike apo publike që mbajmë përkohësisht, qasja ime karshi secilës dhe secilit ka qenë, është dhe do të mbetet gjithmonë pozitive, mbështetëse dhe e barabartë.
Unë besoj fuqishëm se dinjiteti njerëzor dhe profesionalizmi qëndrojnë mbi çdo interes apo kalkulim të ditës, prandaj asnjëherë dhe në asnjë rrethanë nuk kam përdorur dhe nuk do të përdorja gjuhë të papërshtatshme ndaj askujt.
Përmes këtij reagimi, i bëj thirrje publike mediumit që ka lansuar këtë shpifje, si dhe çdo portali tjetër që e ka shpërndarë atë, që ta tërheqin menjëherë lajmin e rremë dhe të kërkojnë falje publike për dëmin e shkaktuar. Në të kundërt, ju njoftoj se do të ndërmarr të gjitha hapat ligjorë të paraparë me legjislacionin në fuqi, duke dorëzuar padi për shpifje dhe prishje të imazhit.
Liria e shprehjes dhe e medias është e shenjtë, por ajo përfundon aty ku fillon shkelja e dinjitetit të tjetrit.
Komentet
Bëhu i pari që komenton.
