Bashkimi Evropian pritet të ridrejtojë fondet e Planit të Rritjes për Ballkanin Perëndimor drejt vendeve që po shënojnë progres më të madh në procesin e reformave dhe integrimit evropian.
Komisioni Evropian po shqyrton rishpërndarjen e mjeteve financiare në favor të Malit të Zi, Shqipërisë dhe Maqedonisë së Veriut, të cilat vlerësohen si më të avancuara në përmbushjen e agjendave reformuese.
Instrumenti i Reformës dhe Rritjes, i krijuar në vitin 2024, synon të mbështesë vendet e Ballkanit Perëndimor në rrugën drejt anëtarësimit në BE, duke e lidhur financimin me zbatimin e reformave konkrete. Megjithatë, sipas të dhënave të Komisionit Evropian, deri më tani janë disbursuar rreth 673 milionë euro nga 6 miliardë të parashikuara.
Në mesin e vendeve kandidate, Mali i Zi, Shqipëria dhe Maqedonia e Veriut kanë përfituar pjesën më të madhe të fondeve, ndërsa Bosnja dhe Hercegovina, Kosova dhe Serbia konsiderohen më të ngadalta në zbatimin e reformave.
Zyrtarë të BE-së theksojnë se fondet nuk humben në mënyrë automatike, por lidhen drejtpërdrejt me përmbushjen e kushteve, duke funksionuar si mekanizëm nxitës për reforma.
Komisioni Evropian pritet që më vonë gjatë muajit të japë detaje shtesë për mënyrën e rishpërndarjes së fondeve dhe skenarët e mundshëm të përdorimit të tyre brenda dhe jashtë rajonit të Ballkanit Perëndimor.
