Korpusi i Gardës Revolucionare Islamike ka deklaruar se Ngushtica e Hormuzit do të mbetet e mbyllur për sa kohë që Shtetet e Bashkuara vazhdojnë, sipas Teheranit, me “kërcënimet” dhe “ndërhyrjen” në transportin detar në rajon.
Deklarata u publikua vetëm disa orë pasi ushtria amerikane njoftoi se kishte goditur dhjetëra objektiva të IRGC-së brenda territorit iranian.
“Ngushtica e Hormuzit nuk do të rihapet për sa kohë që vazhdojnë retorika e tepruar, kërcënimet nga zyrtarët amerikanë dhe ndërhyrja e tyre në lëvizjet detare në rajon. Kërcënimet dhe ndërhyrjet vetëm sa do ta bëjnë situatën më të vështirë dhe më komplekse”, thuhet në deklaratën e Gardës Revolucionare.
Irani pretendon se ka kontroll mbi Ngushticën e Hormuzit, një nga rrugët më të rëndësishme të transportit të naftës në botë, dhe ka paralajmëruar vazhdimisht se do të reagojë ndaj çdo veprimi që e konsideron kërcënim për sigurinë e tij.
Ndërkohë, tensionet në rajon vazhdojnë të përshkallëzohen. Ushtria jordaneze njoftoi se sistemet e saj të mbrojtjes ajrore kanë interceptuar dhe rrëzuar pesë raketa të lëshuara nga Irani drejt territorit të Jordanisë në orët e para të së enjtes, duke shënuar ditën e katërt radhazi me incidente të tilla.
