Pas reshjeve të shumta të borës që një ditë më parë bllokuan shumë rrugë në malësinë e Tetovës, autoritetet lokale kanë intervenuar me makineri për pastrimin e borës gjatë natës. Rrugët sot rezultonin të kalueshme, por më vështirësi, ndërsa në disa vende, ishte pothuajse e pamundur të kalosh pa zinxhira në goma.

“Për momentin janë siç e shihni, nuk janë mirë të kalueshme por duhet të mirëmbahen më mirë. Nëse i ke pajisjet e dimrit kalohet por edhe malësinë duhet kujdes mos e lënë pas dore”, tha një banor.

“Më duket se kanë kaluar me bager, por kot ne jemi vend malor deshe apo s`deshe ja. Rruga pak e ngushtë duhet kthe pas shko para. Zinxhira këndej deri në qytet nuk duhet, por të shohim sot a do hedhin krip apo jo se deri tani mirë është”, tha një tjetër banor.

“I Pastrojmë ne vet ja shiheni. Bageri s`ka kaluar, po ja shiheni taksistët s’janë askund”, theksoi një banor.

Drejtori i ndërmarrjes Publike komunale Tetova tha për Alsat se vështirësitë e ditës së djeshme janë tejkaluar, ndërsa bashkë me kompaninë e kontraktuar vazhdojnë pastrimin e rrugëve

“Jemi të përgatitur për reshjet. Zonat më të rrezikuara ishin dje Vica dhe brodeci por janë të kalueshme sot dhe nuk ka bllokime. Kompania e kontraktuar është në terren dhe po punohet intensivisht që rruga të jetë e kalueshme. Sot edhe ankesa nuk ka, mbrëmë kishim ankesa por sot nuk ka. Apelojmë qytetarët makinat mos ti parkojnë në rrugë që të mos pengojnë procesin e pastrimit”, deklaroi Samet bislimi. Drejtor i NPK “Tetova” Tetovë.

Komuna e Tetovës sivjet ka ndarë rreth 7 milion denarë për mirëmbajtjen dimërore, nga të cilat, 3 milion janë vetëm për furnizimin me kripë të cilën përveç kompanisë për mirëmbajtje të rrugëve, do mund ta përdor edhe Ndërmarrja publike Komunale, ndërsa mirëmbajtja e rrugëve, komunës sivjet i ka kushtuar 4 milion denarë. /Alsat.mk