Kryeministri izraelit, Benjamin Netanyahu, ka sulmuar ashpër presidentin francez, Emmanuel Macron, duke e akuzuar udhëheqjen e Francës se nuk ka vepruar në kohë për të frenuar ekstremizmin islamist.
Deklaratat e tij vijnë pas episodeve të dhunës dhe plaçkitjeve që kanë tronditur vendin.
Në një intervistë për rrjetin televiziv në gjuhën frënge i24News, Netanyahu pretendoi se autoritetet franceze kanë dështuar të përballen me kërcënimin e ekstremizmit radikal, duke deklaruar se Franca është “dorëzuar ndaj pushtimit të Islamit ekstremist”.
I pyetur se çfarë këshille do t’i jepte Macronit pas incidenteve të fundit, kryeministri izraelit i bëri thirrje Francës të heqë dorë nga politika e paqësimit dhe të ndërmarrë masa më të vendosura kundër ekstremistëve.
“Luftoni, mos ndiqni një politikë paqësimi, luftoni ekstremistët”, deklaroi Netanyahu.
Gjatë intervistës, ai iu referua edhe një bisede që pretendon se ka zhvilluar me Macronin pas sulmit të Hamasit ndaj Izraelit më 7 tetor 2023. Sipas tij, në atë kohë e kishte paralajmëruar presidentin francez se kërcënimi nuk do të kufizohej vetëm në Lindjen e Mesme.
“Nëse nuk i eliminojmë këtu, do t’i keni në Paris”, pretendoi Netanyahu se i kishte thënë Macronit, duke shtuar se zhvillimet e fundit në Francë, sipas tij, dëshmojnë se paralajmërimi ishte i drejtë.
Komentet
Bëhu i pari që komenton.
