Vendosja e një kryqi të madh prej hekuri në majën e Ujëmirit dhe dëmtimi i simbolit të shqiponjës dykrenare te kroi i Ujemirit kanë ngritur pikëpyetje për qëllimin e këtyre veprimeve dhe respektimin e hapësirave të përbashkëta malore.
Në majën e malit të Ujëmirit 2062 është vendosur një kryq i madh prej hekuri, ndërsa te kroi i Ujemirit, pranë tavolinës së ndërtuar për pushim dhe ngrënie, është konstatuar dëmtimi i një dërrase, nga e cila është hequr pjesa me kokat e shqiponjës dykrenare.
Deri më tani, nuk dihet se kush qëndron pas vendosjes së kryqit dhe kush është përgjegjës për dëmtimin e simbolit të shqiponjës dykrenare.
Këto veprime ngrenë shqetësime për mënyrën e trajtimit të hapësirave malore dhe për motivet që mund të fshihen pas tyre. Ndërsa vendosja e simboleve mund të ngjallë interpretime të ndryshme, dëmtimi i qëllimshëm i elementeve ekzistuese përbën një veprim që meriton vëmendje dhe trajtim të përgjegjshëm.
Kujt i shërbejnë veprime të tilla? Në vend që malet të shndërrohen në hapësira ku shfaqen shenja të ndasive, ato duhet të mbeten vende të lira për të gjithë, ku mbizotërojnë respekti i ndërsjellë, bashkëjetesa dhe dashuria për natyrën.
Ruajtja e natyrës dhe respektimi i simboleve e i hapësirave të përbashkëta janë përgjegjësi e të gjithëve./TVGURRA
Komentet
Bëhu i pari që komenton.
