Të dhënat e fundit nga Eurostat konfirmojnë se plakja e popullsisë është shndërruar në një proces demografik afatgjatë që po prek ndjeshëm jo vetëm Europën, por edhe Maqedoninë e Veriut.
Ky trend në rritje po hap dilema serioze mbi qëndrueshmërinë e tregut të punës, sistemin e pensioneve dhe perspektivën e zhvillimit ekonomik në vend. Vetëm brenda një dekade, Maqedonia e Veriut ka pësuar një rritje dramatike të moshës mesatare, duke kaluar nga 37.4 vjeç sa ishte në vitin 2015, në një parashikim prej 42.21 vjeç për vitin 2025.
Megjithëse vendi ynë ka ende një popullsi relativisht më të re krahasuar me mesataren e Bashkimit Europian prej 44.9 vjeç, ritmi i plakjes mbetet një tregues shqetësues për të ardhmen.
Në kuadër të krahasimit rajonal, Maqedonia e Veriut pozicionohet më mirë se shumica e fqinjëve, pasi vetëm Mali i Zi regjistron një moshë mesatare më të re prej 40.4 vjeç. Ndërkohë, vendet e tjera të rajonit po përballen me shifra më të larta, ku Shqipëria shënon një mesatare prej 44.3 vjeç, Serbia 45.4 vjeç, ndërsa Kroacia dhe Sllovenia arrijnë në 45.5 vjeç. Situata është edhe më e rënduar në Greqi dhe Bullgari, ku mosha mesatare ka arritur në 47.2 vjeç. Ky fenomen nuk është i izoluar, pasi në të gjithë Bashkimin Europian mosha mesatare është rritur me 2.1 vite që nga viti 2015. Ndërsa Irlanda mbetet vendi me popullsinë më të re në BE me 39.6 vjeç, Italia mban rekordin si popullsia më e vjetër me një mesatare prej 49.1 vjeç. Përjashtim nga ky trend i përgjithshëm bëjnë vetëm Gjermania dhe Malta, të cilat kanë shënuar një rënie të lehtë të moshës mesatare, ndërkohë që rritja më e lartë është vërejtur në vende si Sllovakia dhe Qiproja.
