Kasami pret në Shkup Kryetaren e Kuvendit të Kosovës, Albulena Haxhiu: Diskutohet për projektet infrastrukturore dhe bashkëpunimin dypalësh

Bashkëkryetari i VLEN, Bilall Kasami ka mirëpritur sot në Shkup Kryetaren e Kuvendit të Republikës së Kosovës, Albulena Haxhiu.

Gjatë kësaj vizite, Kasami së bashku me kolegët nga udhëheqësia e koalicionit VLEN dhe kryeparlamentaren Haxhiu zhvilluan një shëtitje në Çarshinë e Shkupit, ku u takuan dhe bashkëbiseduan nga afër me qytetarë dhe zejtarë lokalë.

Në kuadër të këtij takimi miqësor u diskutua për marrëdhëniet mes dy vendeve, e veçanërisht për ecurinë e projekteve të përbashkëta infrastrukturore.

“Në një bashkëbisedim miqësor, biseduam për marrëdhëniet e shkëlqyera mes dy republikave tona, projektet e përbashkëta infrastrukturore që po i shtyjmë si asnjëherë më parë dhe planet për thellimin dhe zgjerimin e këtij bashkëpunimi. Bashkë me Kosovën, bëjmë më të mirën për qytetarët tanë!”, ka deklaruar Kasami.

Lexo edheGashi priti Haxhiun, në fokus bashkëpunimi parlamentar dhe integrimi evropian

Kjo vizitë rikonfirmon përkushtimin e të dyja palëve për thellimin e bashkëpunimit institucional dhe ekonomik ndërmjet Maqedonisë së Veriut dhe Kosovës.