Ka dështuar edhe një tentativë për ta rikthyer në rend dite propozim-Ligjin për “branitellat” në seancën e Komisionit për politika sociale, demografi dhe të rinj. Deputetja socialdemokrate, Jovanka Trençevska kërkoi që propozim-Ligji për “branitellat” i lënë jashtë procedure tashmë disa muaj të futet në rend dite. Por kryetarja e komisionit, Ilire Dauti tha se mund të thërras një seancë tjetër, por sot një propozim i tillë nuk mund të shqyrtohet.

“Nëse ju jeni të interesuar mund të thërrasim tjetër seancë me debat publik ku do të flasim dhe gjitha palët do t’i shprehin qëndrimet e veta. Unë besoj se aty do të kemi rastin të dëgjojmë se derisa flasim për periudhën 1991 e deri sot, nuk mund të përjashtojmë vitin 2001 kur kemi pasur një konflikt të armatosur në të cilin kanë qenë të përfshira dy palë”, tha Ilire Dauti, Kryetare e Komisionit për politika sociale, demografi dhe të rinj.
Deputetja e koalicionit VLEN, Imerlije Saliu kërkoi të ndërpritet puna e komisionit deri në afat të pacaktuar.

“Përpos asaj që jam kundër që të plotësohet rendi i ditës, kërkoj nga ju si kryetare e komisionit që të ndërpritet puna e komisionit këtu deri në afat të pacaktuar”, u shpreh Imerlije Saliu, Deputete e VLEN.

Puna e komisionit do të mbetet në “status quo” deri në krijimin e kushteve për miratimin e raporteve që sot ndodheshin në rend dite. LSDM-ja propozim-Ligjin për “branitellat” e dorëzoi në Kuvend në fillim të muajit shtator. I njëjti u kundërshtua nga partitë shqiptare të cilat kërkuan që bashkërisht me statusin e branitellave të rregullohet edhe statusi i ish ushtarëve të UÇK-së. Opozita maqedonase kërkoi që kreu i Kuvendit, Afrim Gashi në bazë të Rregullores të thërrasë mbledhjen e komisionit, por Gashi tha se ai mund të thërret mbledhjen e trupit punues në bazë të rëndit të ditës dhe jo të thërret mbledhjen për ta plotësuar rendin e ditës. Për veprimet Gashit, partia E Majta ka dorëzuar padi penale. /Alsat.mk