Gashi: BE-ja ishte e padrejtë, por ndryshimet kushtetuese nuk duhet të bëhen problem ndëretnik

Kryetari i Kuvendit të RMV-së, Afrim Gashi thekson se stabiliteti dhe marrëdhëniet ndëretnike në vend duhet të ruhen me çdo kusht.

Duke komentuar qëndrimin e Brukselit ndaj Maqedonisë, Gashi tha se institucionet evropiane kanë qenë të padrejta ndaj vendit në të kaluarën. Megjithatë, ai apeloi që çështja e ndryshimeve kushtetuese të mos abuzohet dhe të mos shndërrohet në një problem ndëretnik.

“BE-ja ishte e padrejtë ndaj Maqedonisë, por ndryshimet kushtetuese nuk duhet të shndërrohen në një problem ndëretnik”, tha Gashi në një intervistë për “360 shkallë”, duke iu referuar tensioneve aktuale sociale-politike dhe çështjeve që lidhen me detyrimet e vendit në rrugën evropiane.

Gashi theksoi se marrëdhëniet ndëretnike janë shtylla më e rëndësishme për stabilitetin e vendit dhe se subjektet politike nuk duhet të përdorin tema të ndjeshme për pika politike ditore, veçanërisht kur bëhet fjalë për qëllimet strategjike dhe euroatlantike të vendit.