Humbja e republikanëve në zgjedhjet në SHBA rrit shpresat për paqe, çmimet e naftës pësojnë rënie drastike

Çmimet e naftës shënuan një rënie të ndjeshme, duke arritur nivelet më të ulëta të muajve të fundit, të nxitura nga pritjet për qetësimin e konfliktit në Lindjen e Mesme dhe përmirësimin e furnizimit global.

Sipas të dhënave të „Trading Economics“, çmimi i naftës së papërpunuar Brent ra me më shumë se 8 për qind, duke zbritur nën 95 dollarë për fuçi dhe duke arritur nivelin më të ulët në dy muajt e fundit. Ndërkohë, nafta amerikane WTI regjistroi një rënie prej mbi 8 për qind, duke zbritur nën 88 dollarë për fuçi, niveli më i ulët në muajin e fundit.

Analistët theksojnë se çmimet u ndikuan nga pritjet se konflikti mes SHBA-së, Izraelit dhe Iranit mund të qetësohet pas humbjes së Partisë Republikane në zgjedhjet afatmesme në SHBA. Lidhur me këto zhvillime, presidenti amerikan Donald Trump deklaroi se Uashingtoni për momentin nuk planifikon sulme të reja ushtarake, por theksoi se SHBA-ja është e gatshme të reagojë nëse do të jetë e nevojshme.

Ndërkohë, përpjekjet diplomatike të Katarit dhe Pakistanit për t’i dhënë fund konfliktit po vazhdojnë. Autoritetet e Katarit janë në pritje të përgjigjeve nga të dyja palët lidhur me propozimet për zgjidhjen e krizës, megjithëse raportimet sugjerojnë se negociatat janë ende larg arritjes së një marrëveshjeje.

Lexo edheSinjalet për një marrëveshje SHBA-Iran, çmimet e naftës bien mbi 6 për qind

Presion shtesë mbi tregun krijoi edhe përmirësimi i furnizimit, pasi rifillimi i eksporteve nga vendet e Gjirit Persik rriti disponueshmërinë e naftës nga Lindja e Mesme mbi kërkesën afatshkurtër për herë të parë që nga muaji korrik. Nga ana tjetër, të dhënat nga SHBA-ja treguan se rezervat komerciale të naftës së papërpunuar u ulën me 865 mijë fuçi javën e kaluar, duke shënuar rënien e pestë javore radhazi.

Investitorët tashmë po vlerësojnë mundësinë e uljes së rrezikut gjeopolitik dhe normalizimit të furnizimit me energji nga Lindja e Mesme, zhvillime që mund të çojnë në uljen e mëtejshme të presionit mbi tregun global të naftës.

Më shumë për këtë

Ulen çmimet e derivateve të naftës në MaqedoniMaqedoni · 1 javë më parëMustafa Dauti merr pjesë në pritjen solemne për 103-vjetorin e Republikës së TurqisëMaqedoni · 7 ditë më parë“The Times”: Vuçiç kishte planifikuar një grusht shteti natën e zgjedhjeve, por u tërhoq në momentin e fundit!Rajon · 1 javë më parë