Presidenti i Shteteve të Bashkuara, Donald Trump, ishte protagonist i një momenti komik gjatë një aktiviteti në Las Vegas, ku ndërhyri për të ndaluar një vogëlush të largohej nga skena, përpara se të bënte edhe një batutë që shkaktoi të qeshura te të pranishmit.
Ngjarja ndodhi gjatë një eventi të organizuar në Red Rock Casino Resort and Spa, ku Trump promovoi programin “Trump Accounts” dhe politikën e administratës së tij për heqjen e taksës mbi bakshishet.
Në skenë, presidenti ftoi një familje nga Las Vegasi, Sandrën dhe Bradin, së bashku me dy fëmijët e tyre. Teksa Sandra po përgatitej të fliste para të pranishmëve, djali i vogël nisi të largohej nga skena, por Trump reagoi menjëherë duke e ndalur. Duke iu drejtuar publikut me humor, ai tha: “Nuk dua që ai të bëhet si Biden dhe të bjerë nga skena”, koment që u prit me të qeshura dhe duartrokitje nga audienca. Pak çaste më vonë, nëna e vogëlushit i tha presidentit se djali dëshironte t’i thoshte disa fjalë. Trump e inkurajoi, ndërsa fëmija foli fillimisht me fjalë të pakuptueshme. Me ndihmën e nënës, ai përsëriti në mikrofon: “Faleminderit për llogarinë time Trump Account.”
