Temperatura po ngrihet përsëri në marrëdhëniet SHBA-Ukrainë, ndërsa Presidenti Donald Trump i bëri thirrje indirekt por qartë Volodymyr Zelensky-t të tërhiqet nga negociatat për t’i dhënë fund luftës.
Presidenti amerikan po fliste me gazetarët jashtë Shtëpisë së Bardhë kur u pyet për Ukrainën. “E dini çfarë, ne i kemi dhënë shumë Ukrainës. Ata nuk na kanë dhënë asgjë, mos harroni këtë. Ne kemi dhënë qindra miliarda dollarë”, tha Trump.
I pyetur për komentin e Zelensky-t duke e akuzuar atë se ishte në anën e gabuar të historisë me marrëveshjen e naftës me Rusinë, Trump e ngriti tonin.
“Zelensky e tha këtë? Zelensky nuk ka idenë për çfarë po flet. Zelensky është një njeri që duhet ta kishte zgjidhur këtë luftë shumë kohë më parë. Nëse do të më kishte dëgjuar, do të kishte bërë një marrëveshje shumë më të mirë shumë kohë më parë dhe do të kishte pasur miliona të mbijetuar në anën e tij”, tha Trump.
Në vijim ai shtoi: “për të qenë i sinqertë, mendoj se është koha që dikush tjetër të negociojë në emër të Ukrainës (…) Ndoshta është koha që Zelensky të gjejë dikë tjetër për të negociuar.”
Komentet
Bëhu i pari që komenton.
