U plagos rëndë në sy gjatë protestës, Vishkulli reagon pas operacionit në Itali: Po përballem me një tjetër sfidë

Erjon Vishkulli, tifozi i njohur i Kombëtares shqiptare, i cili mbeti i plagosur rëndë në sy gjatë protestave studentore në Tiranë, ka reaguar për herë të parë në rrjetet sociale pas ndërhyrjes kirurgjikale në Itali.

28-vjeçari, pjesë e grupimit “Tifozat Kuq e Zi”, po përballet me një periudhë të vështirë rikuperimi, ndërsa mbetet shqetësimi për pasojat që dëmtimi mund të ketë në shikimin e tij.

Lexo edhe“Plumbin e kam ende në sy, por Shqipëria është e jona”/ Dëshmia tronditëse e Erjon Vishkullit, të plagosur gjatë protestës

Përmes një mesazhi publik, Vishkulli ka falënderuar familjarët, miqtë dhe shqiptarët që i kanë qëndruar pranë, duke theksuar se mbështetja e tyre i ka dhënë forcë dhe shpresë për të përballuar këtë situatë.

“Në këto momente të vështira të jetës sime, ku pas një dhimbjeje të madhe po përballem edhe me një sfidë tjetër të rëndësishme për shikimin e syrit, dua të shpreh mirënjohjen time më të sinqertë për të gjithë”, shprehet ai.

Vishkulli thekson se mesazhet, telefonatat dhe solidariteti i qytetarëve kanë qenë një mbështetje e rëndësishme gjatë ditëve të vështira që ka kaluar.

Ai ka shprehur gjithashtu mirënjohjen ndaj Zotit për forcën dhe shpresën, duke uruar që sfida me të cilën po përballet të përfundojë me sukses.

Kujtojmë se Erjon Vishkulli u plagos më 24 tetor, gjatë protestës studentore në kryeqytet. Sipas dëshmisë së tij, ai u godit në sy nga një plumb gome, ndërsa ndodhej pranë forcave të policisë. Pas trajtimit fillestar në Shqipëri, 28-vjeçari u dërgua në Itali për mjekim të specializuar.

Plagosja e tij shkaktoi reagime dhe solidaritet të gjerë, veçanërisht nga komuniteti i tifozëve shqiptarë, ndërsa protestat studentore që kërkojnë dorëheqjen e kryeministrit Edi Rama vijojnë.

Më shumë për këtë

Sot protesta kombëtare, studentët nga i gjithë vendi mblidhen në Tiranë!Shqiperi · 1 javë më parëLajm i mirë nga Roma – Erjon Vishkulli kalon me sukses operacionin, ndërhyrja i shpëton syrinShqiperi · 3 ditë më parëPlagoset rëndë me plumb gome në sy 28 vjeçari, kryetifozi i kombëtares shqiptareShqiperi · 7 ditë më parë