Parlamenti izraelit miraton projektligjin për të ndaluar ezanin për namaz përmes altoparlantëve

Parlamenti izraelit miratoi të mërkurën një projekt-ligj që synon të ndalojë thirrjen e ezanit në Izrael me altoparlantë, transmeton Anadolu.

Gazeta “Israel Hayom” raportoi se parlamenti miratoi projektligjin në leximin e tij paraprak për të shtrënguar zbatimin e ligjit kundër asaj që e përshkroi si “zhurmë xhamie”.

Projektligji kaloi 50-36 në parlamentin 120 anëtarësh, sipas gazetës “Yedioth Ahronoth”.

I prezantuar nga partia Otzma Yehudit, e udhëhequr nga ministri i Sigurisë Kombëtare, Itamar Ben-Gvir, projektligji u mbështet nga partia opozitare Yisrael Beiteinu e politikanit të krahut të djathtë Avigdor Lieberman.

Kreu i Këshillit Kombëtar Palestinez, Rawhi Fattouh e përshkroi veprimin si një “krim” dhe “terrorizëm legjislativ”.

“Është një shkelje e hapur e lirisë së adhurimit dhe besimit”, tha Fattouh në një deklaratë.

Projektligji duhet të kalojë tre lexime shtesë përpara se të bëhet ligj.

Ndalimi i ezanit përmes altoparlantëve do ta zhvesh atë nga qëllimi i tij praktik, pasi shërben për të njoftuar muslimanët për kohët e namazit në vend që të funksionojë thjesht si një ritual i recituar brenda xhamive.

Sipas “Kanalit 14” të Izraelit, legjislacioni i propozuar parashikon që asnjë sistem zanor nuk mund të instalohet ose operohet në asnjë xhami pa autorizim të qartë paraprak.