Energjia elektrike në Maqedoni më e shtrenjta në Ballkan sipas fuqisë blerëse, pavarësisht çmimit të ulët nominal

Maqedonia ka energji elektrike dukshëm më të lirë se mesatarja e Bashkimit Evropian, por kur çmimet përshtaten sipas fuqisë blerëse, shfaqet një realitet tjetër. Të dhënat më të fundit të Eurostat-it për gjysmën e parë të vitit 2026 tregojnë se familjet në Maqedoni paguajnë një çmim relativisht të ulët për kilovat-orë, por sipas standardit të fuqisë blerëse, energjia elektrike është më e shtrenjta ndër vendet e krahasuara të Ballkanit Perëndimor.

Çmimi mesatar i energjisë elektrike për amvisëritë në Maqedoni ishte 11,68 euro për 100 kilovat-orë, duke përfshirë taksat dhe tarifat. Në Serbi çmimi ishte 11,97 euro, në Shqipëri 11,90 euro, në Mal të Zi 10,39 euro, ndërsa në Bosnjë dhe Hercegovinë 9,95 euro. Mesatarja e Bashkimit Evropian arriti në 28,32 euro, që do të thotë se energjia elektrike në BE është nominalisht rreth 2,4 herë më e shtrenjtë se në Maqedoni.

Megjithatë, krahasimi në euro nuk merr parasysh dallimet në nivelin e çmimeve ndërmjet shteteve. Për këtë arsye, Eurostat përdor edhe standardin e fuqisë blerëse (PPS), i cili mundëson krahasimin e vlerës së energjisë elektrike në kushte të ndryshme ekonomike.

Sipas këtij treguesi, çmimi i 100 kilovat-orëve në Maqedoni arrin në 22,4 PPS, kundrejt 19,1 në Bosnjë dhe Hercegovinë, 18,2 në Shqipëri, 17,9 në Mal të Zi dhe 17,8 në Serbi. Kështu, Maqedonia renditet si vendi më i shtrenjtë ndër këto pesë shtete, ndonëse sipas çmimit nominal ndodhet në mesin e listës rajonale.

Lexo edheNesër pa energji elektrike disa vendbanime në Tetovë dhe rrethinë: Ja ku dhe në cilat orare

Dallimi është veçanërisht i dukshëm në krahasim me Serbinë. Atje energjia elektrike kushton pak më shumë në terma nominalë, por kur merret parasysh fuqia blerëse, çmimi në Maqedoni është rreth 26 për qind më i lartë. Në raport me Malin e Zi, diferenca është afërsisht 25 për qind, ndërsa në krahasim me Shqipërinë arrin rreth 23 për qind.

Këta tregues nuk tregojnë se sa pjesë të pagës shpenzojnë qytetarët për energji elektrike, por shprehin çmimin e përshtatur sipas nivelit të përgjithshëm të çmimeve në secilin shtet. Për të përcaktuar barrën reale mbi buxhetin familjar, duhet të merren parasysh edhe të ardhurat e familjeve, konsumi mujor dhe shpenzimet për nevojat e tjera të jetesës.

Për më tepër, të dhënat tregojnë lëvizje të ndryshme të çmimeve në Maqedoni dhe në Bashkimin Evropian. Ndërsa çmimi mesatar i energjisë elektrike për amvisëritë në BE gjatë gjashtë muajve të parë të këtij viti u ul me 2,2 për qind krahasuar me gjashtëmujorin paraprak, në Maqedoni u regjistrua rritje.