Policia holandeze ka nisur një ndjekje ndërkombëtare për Ninoslava Jović, 41 vjeçe nga Nishi, e dyshuar për ndihmë në një nga grabitjet më të mëdha të bizhuterive në Evropë. Grabitja ndodhi në panairin prestigjioz të artit dhe antikitetit TEFAF në Maastricht në vitin 2022, kur u vodhën bizhuteri me vlerë rreth 40 milionë euro. Hetuesit dyshojnë se pas grabitjes qëndrojnë anëtarë të grupit të njohur kriminal “Pink Panther”, transmeton Pa Censurë. Ninoslava Jović është në listën e të arratisurve më të kërkuar në Evropë. Fotografitë dhe përshkrimi i saj personal janë publikuar në faqet e internetit të policisë holandeze dhe Europolit, njofton “Blic” serb.
Sipas hetuesve, e dyshuara mund të jetë në Serbi dhe herën e fundit është parë në Nish. Policia nuk e përjashton mundësinë që ajo të udhëtojë në vende të tjera.
Prokuroria holandeze në provincën Limburg ka ofruar një shpërblim prej 20.000 eurosh për informacione që do të çojnë në arrestimin e të dyshuarve.
**E dyshuar për ndihmë ndaj grupit të njohur kriminal**
Sipas policisë holandeze, Jović nuk ka marrë pjesë drejtpërdrejt në thyerjen e vitrinave dhe vjedhjen e sendeve të vlefshme, por dyshohet se ka ndihmuar autorët.
Ajo është një nga pesë shtetasit serbë që kërkohen nga autoritetet holandeze në lidhje me grabitjen. Së bashku me të, në listë janë Aleksandar Cenić (50), Aleksandar Stojiljković (50), Duško Dimitrijević (50) dhe Bratislav Stojanović (41).
Hetuesit dyshojnë se katër burrat janë të lidhur me grupin kriminal Pink Panther, i njohur për grabitjet e organizuara të dyqaneve luksoze të bizhuterive në mbarë botën.
Policia ka publikuar edhe një përshkrim të detajuar të Jović për të ndihmuar në identifikimin e saj. Ajo ka sy kafe, flokë natyralisht kafe ose biondë dhe dy tatuazhe të dallueshme në parakrahë. Në krahun e djathtë ka tatuazhin e emrit “Selena”, ndërsa në të majtin fjalën “Vera”, përcjell Pa Censurë.
**Dy gra misterioze të fotografuara pas grabitjes**
Hetuesit holandezë po përpiqen të identifikojnë edhe dy gra që u kapën nga kamerat e sigurisë pas grabitjes. Sipas informacioneve policore, ato ishin në makinën “Opel” që të dyshuarit përdorën pas grabitjes.
Pas ndalimit në Belgjikë, automjeti përfundoi në parkingun e një hoteli në Frankfurt, ku kamerat xhiruan dy gra që dilnin nga makina. Të dyja mbanin fustane, ndërsa njëra kishte sandale të kuqe.
Policia thekson se aktualisht nuk i konsideron si të dyshuara për grabitjen, por dëshiron të flasë me to sepse mund të kenë informacione të rëndësishme për hetimin dhe gjetjen e të arratisurve.
**Me çekanë thyen vitrinat dhe vodhën një kollierë diamanti me vlerë 27 milionë euro**
Më 28 qershor 2022, në panairin TEFAF në Maastricht të Holandës, një nga panairët më të njohura të artit dhe antikitetit në botë, ndodhi një grabitje spektakolare.
Katër burra hynë në panair duke u paraqitur si vizitorë të zakonshëm. Ata u afruan te hapësira e ekspozimit me bizhuteri të shtrenjta, pastaj papritur thyen vitrinat e qelqit me çekanë dhe morën sendet e vlefshme.
Vlera e bizhuterive të vjedhura u vlerësua rreth 40 milionë euro. Ndër sendet më të vlefshme ishte një kollierë diamanti e verdhë, e vlerësuar deri në 27 milionë euro.
Disa nga sendet e vjedhura u gjetën më vonë në Hong Kong, Izrael dhe Botsvana, por pjesa më e madhe e plaçkës ende kërkohet.
Përveç shpërblimit prej 20.000 eurosh për informacione që do të çonin në arrestimin e të dyshuarve, kompania e sigurimeve ka ofruar deri në 600.000 euro për informacione që do të ndihmonin në gjetjen e bizhuterive të vjedhura.
Policia dhe prokuroria holandeze vazhdojnë hetimin dhe ftojnë qytetarët që kanë informacione të dobishme të drejtohen te shërbimet kompetente.
Komentet
Bëhu i pari që komenton.
