Qeveria izraelite ka miratuar njëzëri njohjen zyrtare të gjenocidit armen, në një vendim që pritet të përshkallëzojë më tej tensionet diplomatike me Turqinë.
Duke prezantuar vendimin në mbledhjen e kabinetit, ministri i Jashtëm i Izraelit, Gideon Sa’ar, deklaroi se mohimi i gjenocidit armen ka qenë pjesë e një fushate të organizuar, të udhëhequr kryesisht nga qeveria turke.
“Pavarësisht dokumentacionit të gjerë dhe të qartë historik, gjenocidi armen vazhdon të jetë objekt i një fushate të institucionalizuar mohimi dhe minimizimi, përmes rishkrimit manipulues të historisë”, tha Sa’ar.
Ai shtoi se ekziston një konsensus i gjerë historik se Perandoria Osmane kreu krime që përbëjnë gjenocid, me synimin për shkatërrimin sistematik të popullit armen.
Gjenocidi armen, i kryer ndërmjet viteve 1915 dhe 1923, konsiderohet se mori jetën e rreth 1.5 milionë armenëve. Mbi 30 shtete, përfshirë Shtetet e Bashkuara, Francën, Gjermaninë dhe Kanadanë, e kanë njohur tashmë zyrtarisht atë si gjenocid, ndërsa Turqia vazhdon ta kundërshtojë këtë përkufizim.
Vendimi i Izraelit vjen në një moment kur marrëdhëniet mes Tel Avivit dhe Ankarasë janë përkeqësuar ndjeshëm, veçanërisht pas luftës në Gaza.
Presidenti turk Recep Tayyip Erdogan reagoi menjëherë, duke deklaruar se Izraeli do të mbahet përgjegjës për atë që ai e cilësoi si “gjenocid në Gaza”.
“Ne kemi bërë premtime ndaj të shtypurve dhe kemi një përgjegjësi ndaj tyre. Në Gaza ndodhi një gjenocid dhe sulmet vazhdojnë edhe sot. Për këtë gjenocid do të ketë llogaridhënie, pa asnjë dyshim”, u shpreh Erdogan gjatë një takimi me drejtuesit e Partisë për Drejtësi dhe Zhvillim (AKP).
Ai akuzoi Izraelin për vrasje të qëllimshme të civilëve palestinezë, duke përmendur edhe rastin e Hind Rajab, vajzës palestineze që humbi jetën gjatë konfliktit.
Nga ana e tij, ministri izraelit Gideon Sa’ar hodhi poshtë pretendimet se njohja e gjenocidit armen ishte një akt hakmarrjeje ndaj Turqisë.
“Kjo nuk është një masë hakmarrëse për retorikën armiqësore dhe veprimet e Turqisë nën udhëheqjen e Erdogan-it. Por fakti që Turqia promovon narrativa të rreme kundër Izraelit nuk i jep asaj imunitet nga të vërtetat historike”, deklaroi ai.
