Komuna e Tearcës ka mbetur sot pa furnizim me energji elektrike, pasi operatori energjetik EVN ka ndërmarrë masën e shkyçjes nga rrjeti për shkak të faturave të papaguara.

Lajmi është konfirmuar zyrtarisht nga vetë kompania përmes një njoftimi të shkurtër:

“Komuna e Tearcës është e shkyçur si rezultat i faturave të papaguara ndaj Elektrodistribuimit.
Me respekt,
Elektrodistribuimi.”

Ndërprerja e rrymës ka bllokuar aktivitetin e përditshëm të administratës komunale dhe ka shkaktuar reagime të shumta në opinionin publik, ndërsa qytetarët shprehin shqetësimin për pasojat që kjo situatë mund të ketë në ofrimin e shërbimeve publike.

Rasti ka nxitur reagime edhe nga subjekte politike, të cilat kërkojnë hetim të mënyrës së menaxhimit të financave në komunë dhe transparencë lidhur me borxhet e akumuluara.

Nga Komuna e Tearcës ende nuk ka një reagim zyrtar lidhur me situatën.