KQZ-ja rrëzon akuzat e Netanyahut: Nuk ka prova për vjedhje votash nga partitë arabe

Drejtori i përkohshëm i përgjithshëm i Komisionit Qendror të Zgjedhjeve në Izrael, Dean Livneh, ka hedhur poshtë akuzat për manipulim të zgjedhjeve parlamentare, duke deklaruar se nuk ka prova që votuesit arabë apo partitë e tyre politike të kenë siguruar vota në mënyrë të paligjshme.

Partitë arabe Ra’am dhe Fletëvotimi i Përbashkët kanë shënuar rezultate më të mira se pritshmëritë, duke siguruar gjithsej 19 vende, sipas rezultateve të përkohshme.

Pas këtyre rezultateve, partia e djathtë Likud, e kryeministrit izraelit Benjamin Netanyahu, akuzoi partitë arabe për mashtrim zgjedhor. Sipas pretendimeve të saj, zgjedhjet u “vodhën nga partitë arabe që mbështesin terrorizmin dhe shkatërrimin e shtetit hebre”.

Edhe ministri i Sigurisë Kombëtare, Itamar Ben-Gvir, një figurë e së djathtës ekstreme dhe pjesë e bllokut të Netanyahut, kërkoi arrestimin e udhëheqësve të partive arabe, ndaj të cilëve janë ngritur akuza për mbështetje nga jashtë.

Lexo edheOpozitari izraelit bën thirrje për koalicion me partitë arabe për ta larguar Netanyahun nga pushteti

Megjithatë, Livneh deklaroi për transmetuesin publik Kan se nuk ka asnjë tregues që partitë arabe të kenë siguruar vota në mënyrë të paligjshme.

Një zyrtar i lartë i policisë i cilësoi akuzat si propagandë pa bazë faktike. Në një prononcim për gazetën Haaretz, ai theksoi se numri i ankesave për parregullsi gjatë procesit zgjedhor ishte më i ulët krahasuar me zgjedhjet e mëparshme.

Ndërkohë, komisioneri i Policisë, Daniel Levy, deklaroi se çdo ankesë lidhur me zgjedhjet do të hetohet plotësisht dhe në mënyrë të paanshme. Ai theksoi se, në rast të dyshimeve për vepra penale, policia do të veprojë për të zbardhur të vërtetën dhe për të vënë para drejtësisë personat përgjegjës.

Presidenti izraelit, Isaac Herzog, bëri thirrje që të mos stigmatizohet i gjithë komuniteti arab në Izrael për shkak të këtyre akuzave.

“Arsyet e dyshimit duhet të hetohen, por nuk duhet të shpifim një komunitet të tërë që ushtroi të drejtën e tij për të votuar”, thuhet në deklaratën e tij.

Edhe kreu i partisë Ra’am, Mansour Abbas, i hodhi poshtë akuzat për mashtrim zgjedhor, duke mohuar çdo përfshirje të partisë së tij në këtë çështje.

“Ra’am nuk ka absolutisht asnjë lidhje me këtë çështje apo me ndonjë çështje tjetër. Ne deklarojmë se do të bashkëpunojmë plotësisht me të gjitha autoritetet e zbatimit të ligjit për të përcaktuar të vërtetën”, thuhet në deklaratën e Abbasit, të dërguar agjencisë AFP nga zëdhënësi i tij.

Më shumë për këtë

Turqia mohon ndërhyrjen në zgjedhjet izraelite: Akuzat janë fushatë e qëllimshme dezinformimiLajme · 8 orë më parëIzraeli pa fitues, Netanyahu humbet shumicën parlamentareLajme · 2 ditë më parëZgjedhjet në Izrael, Netanyahu rrezikon të humbasë pushtetin pas vitesh në krye të venditLajme · 4 ditë më parë