Një rrahje masive mes deputetëve të partisë në pushtet “Kontrata Qytetare” dhe partisë opozitare “Armenia e Fortë” e ndërpreu këtë mëngjes seancën e Asamblesë Kombëtare të Armenisë. Në incident kishte deputetë të lënduar, ndërsa në parlament arriti edhe një ambulancë, njofton “Armenian Report”.
Tensioni filloi gjatë fjalimit të Taron Çahojanit, përfaqësues i partisë në pushtet. Ai iu drejtua drejtpërdrejt Narek Karapetjanit, liderit të grupit opozitar “Armenia e Fortë”, duke përmendur përfshirjen e familjes së tij në politikë.
Karapetjani reagoi me thirrje nga vendi i tij, ndërsa pasi Çahojani iu përgjigj, deputetët e opozitës u ngritën nga vendet e tyre, pas së cilës situata eskaloi në një përleshje fizike masive.
Në situatën kaotike u shkëmbyen grushte, ndërsa zëvendëskryetari i parlamentit, Vahagn Aleksanjan, hodhi një karrige drejt përfaqësuesve të opozitës.
Kryetari i Asamblesë Kombëtare, Ruben Rubinjan, e ndoqi incidentin për disa minuta, pas së cilës shpalli një pauzë dhe thirri rojen e Asamblesë të intervenonte. Sipas mediave armene, grindja dhe përleshjet fizike vazhduan edhe në korridoret e parlamentit.
Pasojat e incidentit ishin të dukshme te disa deputetë. Andranik Gevorgjanit, përfaqësues i “Armenisë së Fortë”, i rrjedhte gjaku nga hunda, ndërsa veshjet e kolegut të tij partiak Ruben Mhitarian ishin të grisura.
Pas rrahjes, partia në pushtet “Kontrata Qytetare” thirri një seancë të mbyllur.
Rubinjani deklaroi se e dënon me vendosmëri sjelljen e Davtjanit. Ai gjithashtu hodhi poshtë kritikat se roja e Asamblesë reagoi me vonesë, si dhe akuzat e opozitës se incidenti ishte planifikuar paraprakisht.
Ai njoftoi edhe një verifikim të pretendimeve se ndihmësit e përfaqësuesit të “Armenisë së Fortë” i sulmuan deputetët në korridore. Sipas tij, disa truproja ishin regjistruar si ndihmës parlamentarë. Rubinjani theksoi se personave për të cilët do të vërtetohet se kanë shkelur rregullat nuk do t’u lejohet hyrja në Asamblenë Kombëtare.
Për incidentin u shpreh edhe kryeministri armen Nikol Pashinjan. Në një briefing me gazetarët ai dënoi dhunën, por njëkohësisht mbështeti masat që mori partia në pushtet pas ngjarjeve në parlament, njofton “Armenpress”.
Pashinjani e hodhi përgjegjësinë e plotë për incidentin mbi opozitën dhe në deklaratën e tij e justifikoi reagimin e partisë në pushtet.
“Përgjegjësinë e plotë për atë që ndodhi ia hedh opozitës. Pavarësisht nëse është me karrige apo me diçka tjetër, është proporcionale dhe e saktë”, deklaroi Pashinjani.
Incidenti shkaktoi ndërprerjen e seancës parlamentare dhe ngriti pyetje për përgjegjësinë e pjesëmarrësve, veprimin e rojes dhe rrethanat në të cilat u arrit te përleshja fizike.
Komentet
Bëhu i pari që komenton.
