Thesari që fshehu sekretin nga hapësira, çfarë zbuluan shkencëtarët në Spanjë?

Thesari i Villenës, i zbuluar në Spanjë në vitin 1963, përmbante rreth 60 objekte prej ari, argjendi dhe hekuri. Analizat shkencore zbuluan se dy prej tyre ishin prodhuar nga hekur me origjinë meteorike, një material që kishte mbërritur në Tokë nga hapësira.

Një thesar i zbuluar më shumë se 60 vite më parë në Spanjë ka nxjerrë në dritë një të dhënë të rëndësishme për përdorimin e metaleve nga qytetërimet e lashta. Shkencëtarët kanë identifikuar dy objekte të prodhuara nga hekur meteorik, në një periudhë kur përpunimi i hekurit nga mineralet tokësore nuk ishte përhapur ende në Europën Perëndimore.

Bëhet fjalë për Thesarin e Villenës, të cilin arkeologu José María Soler García e zbuloi në dhjetor të vitit 1963, në provincën Alicante të Spanjës.

Thesari përmbante rreth 60 objekte me peshë totale afro 10 kilogramë, nga të cilat rreth 9 kilogramë ishin ar. Mes tyre ndodheshin enë, byzylykë, objekte prej argjendi dhe disa pjesë hekuri.

Lexo edheGjaku i Hitlerit analizohet pas 80 vitesh, shkencëtarët zbulojnë të dhëna të pazakonta për diktatorin

Vëmendjen e studiuesve e tërhoqën dy objekte të veçanta, një shirit metalik i përkulur dhe një sferë e vogël e zbrazët. Analizat e përbërjes kimike treguan se materiali i tyre ishte hekur meteorik, i cili kishte mbërritur në Tokë përmes një meteoriti.

Ky zbulim ka rëndësi arkeologjike, pasi tregon se komunitetet e lashta përdornin hekurin meteorik përpara përhapjes së teknologjisë së prodhimit të hekurit nga mineralet tokësore. Për shkak të rrallësisë, ky material mund të kishte një vlerë të veçantë për shoqëritë e asaj periudhe.