Në Preshevë gjatë fundjavës është mbajtur për të dytën herë me radhë konferenca ekonomike e organizuar nga shoqata “Unioni i Afaristëve Vizioni – Preshevë, Medvegjë, Bujanoc” me moton “Ekonomia shpëton Luginën e Preshevës”.

Në këtë konferencë ishin të pranishëm mbi 300 pjesëmarrës kryesisht biznesmenë jo vetëm nga këto komuna, por edhe viset tjera shqiptare si Shqipëria, Kosova, Maqedonia e Veriut, Mali i Zi, diaspora si nga Zvicra, vendet e BE-së, Turqia e deri tek Australia e largët.

Këtë konferencë e madhështoi edhe më prezencna e ambasadorëve, kryetares së komunës së Preshevës, Ardita Sinani, deputetit shqiptar Shaip Kamberi, por sidomos edhe prania e filantropit, humansitit dhe biznesmenit të njohur, Lazim Destani.

Destani në fjalën e tij në konferencë theksoi se fuqizimi i ekonomisë së kësaj ane vetvetiu sjell vende të reja pune, dhe kjo i duhet sot Luginës, rinisë e popullatës së këtushme. “Uroj që bashkëpunimi mes bizneseve tona të jetë gjithnjë në rritje e në funksion të zhvillimit ekonomik, për jetë më të mirë e për progresin tonë si komb”, theksoi filantropi Lazim Destani.

Ai i përcolli një mesazh Beogradit përmes një pyetje të parashtruar nga Televizioni i Serbisë (RTS). “Serbia nëse nuk i ndihmon shqiptarët e Luginës, bile mos i pengoni”, kishte theksuar Lazim Destani.

Duke folur për largimin e të rinjve nga Lugina e Preshevës, biznesmeni i mirënjohur shqiptar deklaroi për portalin Lecanton27: E kuptojmë largimin e të rinjve tanë nga këto treva, se ata nuk largohen nga luksi apo qejfi, por kuptohet kanë halle, madje edhe ndonjë zor të madh, sepse nuk është e lehtë ti kthehet shpina vendlindjes e shtëpisë. Atyre u mohohet e drejta për punë, nuk kanë perspektivë dhe kjo i detyron të marrin rrugën e perëndimit. Por unë jam optimist se ata nuk do të qëndrojnë atje përgjithmonë, ata do të kthehen në vendlindje pasi të fitojnë, për të krijuar më pas një biznes në atdhe”.