Ramadan Zaskoci është një nga figurat më pak të njohura, por më të rëndësishme të qëndresës shqiptare kundër pushtuesve. I lindur në vitin 1860 në burgun e Prishtinës, pasi prindërit e tij ishin arrestuar për pjesëmarrje në kryengritjet antiosmane, ai e nisi jetën mes vuajtjeve dhe e vazhdoi atë në beteja për mbrojtjen e trojeve shqiptare.
Me origjinë nga Mamzi i Lumës, Zaskoci mori pjesë në Lidhjen e Prizrenit, luftoi kundër ushtrive osmane, mbrojti trojet shqiptare nga malazezët dhe më pas udhëhoqi rezistencën kundër pushtimit serb në vitet 1912–1913. Për shkak të aktivitetit të tij, familja iu masakrua, shtëpia iu dogj disa herë dhe ai u përndoq vazhdimisht, por nuk pranoi as para e as poste për të tradhtuar çështjen kombëtare.
Fundi i tij erdhi në mënyrën më të dhimbshme. Ramadan Zaskoci u vra në vitin 1914 nga shqiptarë të paguar nga autoritetet serbe. Para se të ndërronte jetë, ai u la bashkëluftëtarëve amanetin të vazhdonin luftën kundër pushtuesve dhe të largonin tradhtarët nga radhët e tyre.
Edhe pse konsiderohet një prej prijësve më të rëndësishëm të Lumës, historia e Ramadan Zaskocit ka mbetur në hije. Jeta e tij mbetet një dëshmi e sakrificës, qëndresës dhe përkushtimit ndaj lirisë së Shqipërisë.
Komentet
Bëhu i pari që komenton.
