Prokurori Publik i Republikës së Maqedonisë së Veriut e merr me seriozitet të veçantë apelimin nga pushteti ekzekutiv dhe nga publiku në përgjithësi për rritjen e aktiviteteve të të gjithë organeve hetuese, dhe veçanërisht të Prokurorisë Publike, në luftën kundër korrupsionit.
Për këtë arsye, në kuadër të kompetencave të tij, të cilat janë organizative dhe nuk ndërhyjnë në veprimet e prokurorëve publikë, Prokurori i Publik ka ndërmarrë hapa për një reorganizim të thellë të Prokurorisë Publike, që mundëson një ndjekje penale më efikase të autorëve të veprave penale, veçanërisht në fushën e krimit financiar dhe korrupsionit.
Në këtë drejtim, Prokurori Publik i Republikës së Maqedonisë së Veriut ka miratuar një Udhëzim të Detyrueshëm, me të cilin për shkak të mbrojtjes së interesit publik dhe për një hetim dhe ndjekje penale më efikase të veprave penale dhe autorëve të tyre, i detyron të gjithë prokurorët publikë që të japin prioritet menjëherë në procedimin e çështjeve të korrupsionit dhe atyre të interesit të veçantë publik. Për këto çështje do të jepet prioritet edhe nga ana e qendrave të hetimit të prokurorive, ndërsa të gjithë prokurorët që kanë çështje të tilla janë të detyruar menjëherë t’i azhurnojnë ato në kuptimin e verifikimit të veprimeve të ndërmarra dhe të urdhërave dhe kërkesave të lëshuara dhe përgjigjeve të marra nga organet dhe institucionet përkatëse. Nëse nuk ka ardhur asnjë përgjigje ose të dhëna përkatëse nga institucionet dhe organet përkatëse brenda afatit ligjor të përcaktuar, do të dërgohen urgjenca për veprim të menjëhershëm.
Prokurorët publikë të prokurorive publike janë të detyruar që brenda 10 ditëve të punës nga miratimi i Udhëzimit të mbajnë një kolegj profesional me të gjithë prokurorët e prokurorive publike, ku do të shqyrtohet volumi i punës së secilës prokurori në lidhje me çështjet e korrupsionit, sipas numrit të çështjeve, paraqitësve, veprimeve të ndërmarra dhe urdhërave të lëshuara, do të analizohen sfidat gjatë procedimeve të këtyre çështjeve dhe do të paraqiten propozime për zgjidhjen e tyre me qëllim ndjekjen më efikase penale.
Prokurorët e lartë të prokurorive të larta janë të detyruar, brenda 10 ditëve të punës nga miratimi i Udhëzimit, të mbajnë një kolegj profesional me të gjithë prokurorët publikë të prokurorive të larta, ku do të shqyrtohet volumi i punës së secilës prokurori në lidhje me çështjet e korrupsionit, sfidat gjatë procedimeve të çështjeve të tilla në nivelin e dytë dhe propozimet për zgjidhjen e tyre për një ndjekje më efikase penale.
Për të gjitha këto aktivitete do të dorëzohen raporte te Prokurori Publik i Republikës së Maqedonisë së Veriut, dhe nëse konstatohen vonesa të pajustifikuara të procedurave, do të kryhet një mbikëqyrje e jashtëzakonshme mbi veprimet e prokurorëve përkatës.
Po ashtu, Prokurori Publik i Republikës së Maqedonisë së Veriut shqyrtoi procesverbalin dhe raportin përfundimtar nga mbikëqyrja e kryer në Prokurorinë e Lartë të Shkupit, si dhe shënimet shoqëruese, dhe bazuar në gjetjet nga gjendjet e konstatuara, vendosi që Komisionit për përcaktimin e përgjegjësisë disiplinore të prokurorëve publikë t’i dorëzojë një propozim për nisjen e procedurës disiplinore kundër një prokurori të Prokurorisë së Lartë të Shkupit për shkak të punës jo profesionale dhe të pakujdesshme në 4 çështje, në të cilat ai ka tërhequr ankesën ose akuzën. Po ashtu, një propozim për nisjen e procedurës disiplinore është dërguar edhe kundër Prokurorit të Lartë të Prokurorisë së Lartë të Shkupit, përpara të cilit janë referuar çështjet dhe me miratimin e të cilit është marrë vendim në tre nga këto çështje, si dhe për shkak të mangësive të konstatuara në mënyrën e regjistrimit të çështjeve në Prokurorinë e Lartë të Shkupit.
Nisja e procedurës disiplinore është një tjetër konfirmim i përkushtimit të Prokurorit Publik të Republikës së Maqedonisë së Veriut për të mundësuar një ndjekje penale efikase të autorëve të veprave penale dhe për të kërkuar përgjegjësi nga prokurorët publikë që kanë vonuar pa arsye procedurat ose kanë hequr dorë pa arsye nga ndjekja penale.
Një hap shtesë në këtë drejtim është edhe forcimi i transparencës së Prokurorisë Publike, veçanërisht në procedurat që lidhen me veprat penale të korrupsionit dhe që janë të interesit të veçantë publik. Me këtë qëllim, Prokuroria Publike tashmë ka planifikuar një briefing për gazetarët më 11.12.2024, në të cilin do të marrin pjesë të gjithë prokurorët publikë që kanë çështje të interesit publik, dhe përmes këtij briefing-u, përfaqësuesit e mediave do të kenë mundësinë të marrin informacione direkte nga prokurorët kompetentë për procedimin e çështjeve të caktuara.
Prokurori i Pushtetit të Republikës së Maqedonisë së Veriut vazhdon, në bashkëpunim me të gjithë aktorët dhe me mbështetje nga partnerët ndërkombëtarë, të punojë për forcimin e të gjitha kapaciteteve të Prokurorisë Publike në luftën kundër korrupsionit.
