Mossad alarmon Shtëpinë e Bardhë: Dyshohet se Irani po përgatit atentat me dron ndaj Trumpit

Shërbimi sekret izraelit, Mossad, ka informuar Agjencinë Qendrore të Inteligjencës Amerikane (CIA) se Irani dyshohet se po planifikon sulme kundër presidentit Donald Trump dhe anëtarëve të lartë të administratës së tij, përfshirë përdorimin e dronëve të pajisur me eksploziv.

Lajmin e ka raportuar gazeta izraelite “Israel Hayom”, duke iu referuar zyrtarëve të lartë izraelitë dhe amerikanë.

Sipas këtyre burimeve, informacionet e inteligjencës kanë nxitur autoritetet amerikane të forcojnë ndjeshëm masat e sigurisë. Një tjetër agjenci perëndimore e inteligjencës thuhet se ka konfirmuar informacionet e Mossadit.

Bëhet me dije se agjencitë amerikane i kishin kërkuar shërbimit izraelit të verifikonte të dhënat për kërcënimet iraniane. Drejtori i Mossadit, Roman Gofman, ndodhet në Shtetet e Bashkuara, ku ka zhvilluar takime me drejtues të inteligjencës amerikane, përfshirë drejtorin e CIA-s, John Ratcliffe.

Lexo edheKreu i Mossadit zbarkon në Uashington, çfarë po përgatitet kundër Iranit? Trump përballë presionit të Netanyahut

Dronët me eksploziv, kërcënimi që shqetëson Uashingtonin

Sipas një zyrtari të lartë, autoritetet amerikane kishin dijeni prej kohësh për kërcënimet iraniane ndaj drejtuesve të administratës Trump, veçanërisht pas vrasjes së udhëheqësit suprem iranian, Ali Khamenei, në fillim të ofensivës së përbashkët amerikano-izraelite.

Megjithatë, informacionet e fundit tregojnë për kërcënime më konkrete dhe më të afërta në kohë.

Një nga skenarët që shqetëson shërbimet e sigurisë është përdorimi i dronëve të ngarkuar me eksploziv, të cilët paraqesin vështirësi të veçanta për sistemet tradicionale të mbrojtjes së personaliteteve. Për këtë arsye, disa zyrtarë të lartë amerikanë kanë kufizuar pjesëmarrjen në aktivitete publike në ambiente të hapura.

Ministrat amerikanë zhvendosen në baza ushtarake

Sipas raportimeve të “Fox News”, sekretari amerikan i Thesarit, Scott Bessent, është larguar përkohësisht nga banesa e tij në lagjen Georgetown të Uashingtonit dhe është zhvendosur në një bazë ushtarake të sigurt. Bessent mbikëqyr zbatimin e sanksioneve ekonomike amerikane kundër Iranit.

E njëjta media raporton se edhe sekretari i Shtetit, Marco Rubio, i cili kundërshton një marrëveshje me Teheranin, është zhvendosur në një objekt të mbrojtur ushtarak.

Ndërkohë, sekretari i Mbrojtjes, Pete Hegseth, po qëndron gjithashtu në një strukturë ushtarake me masa të përforcuara sigurie.

Autoritetet kanë shtuar mbrojtjen edhe për daljet publike të presidentit Trump. Aktivitetet në ambiente të hapura janë reduktuar ndjeshëm, ndërsa për ato që zhvillohen, ekipet e sigurisë përdorin sisteme të specializuara kundër dronëve.

Paralajmërimi i Mossadit ndërlikon negociatat me Iranin

Sipas burimeve të cituara nga Israel Hayom, kërcënimet e raportuara kanë ndikuar edhe në qëndrimin e presidentit Trump ndaj negociatave me Teheranin.

Bisedimet mbështeteshin në një memorandum mirëkuptimi të arritur në maj, por perspektiva e një marrëveshjeje është dobësuar.

Zyrtarët pretendojnë se Irani ka treguar njëfarë fleksibiliteti për çështjen bërthamore, por vazhdon të kërkojë heqjen e bllokadës detare, lehtësimin e një pjese të konsiderueshme të sanksioneve dhe zhbllokimin e aseteve iraniane jashtë vendit përpara negociatave thelbësore.

Në këtë situatë, Trump ka vendosur të largojë zëvendëspresidentin JD Vance nga procesi negociator.

Vance kishte mbështetur përpjekjet për arritjen e një marrëveshjeje dhe, sipas raportimeve, kishte kërkuar të organizonte një takim të drejtpërdrejtë me zyrtarë të lartë iranianë për t’i dhënë fund luftës.

Trump: Nuk kemi nevojë për marrëveshje me Iranin

Në një deklaratë të publikuar të enjten, presidenti amerikan njoftoi se i kishte kërkuar Vance të përqendrohej plotësisht te lufta kundër korrupsionit dhe kriminalitetit në qytetet dhe shtetet që drejtohen nga demokratët.

Trump mbajti gjithashtu një qëndrim të prerë për negociatat me Teheranin. “Nuk kemi nevojë për një marrëveshje me Iranin. Ato kohë kanë kaluar prej kohësh”,deklaroi ai.

Presidenti amerikan pretendoi se Shtetet e Bashkuara kontrollojnë qindra miliarda dollarë të Iranit dhe Ngushticën e Hormuzit, një nga korridoret më të rëndësishme për transportin ndërkombëtar të naftës.

SHBA mund të zgjerojë presionin ekonomik ndaj Teheranit

Pavarësisht qëndrimit të ashpër të Trumpit, mbetet e paqartë se çfarë vendimi do të marrë administrata amerikane për fazën e ardhshme të përballjes me Iranin.

Sipas raportimeve, Uashingtoni po shqyrton zgjerimin e masave ekonomike për të kufizuar më tej tregtinë iraniane.

Përpjekjet mund të përqendrohen në ndërprerjen e rrugëve të importit dhe eksportit përmes pikave kufitare tokësore, veçanërisht atyre që lidhin Iranin me Irakun dhe Turqinë.

Këto zhvillime vijnë në një moment kur kërcënimet e raportuara ndaj drejtuesve amerikanë po shtojnë tensionet dhe po e vështirësojnë rikthimin e palëve në tryezën e negociatave.

Më shumë për këtë

Kërcënoi se do të vriste Trumpin, arrestohet 26-vjeçari venezuelian pranë Shtëpisë së Bardhë: “Zërat më urdhëruan”Lajme · 1 javë më parëBE alarmon qytetarët: Përgatituni të mbijetoni 72 orë pa ndihmën e autoriteteve, ja çfarë duhet të ketë çanta e emergjencësLajme · 3 orë më parëTrump humbi zgjedhjet e mesmandatit, reagon Irani: Amerikanët i thanë ‘JO’ luftësLajme · 1 javë më parë