Prokuroria serbe ia ka ngrirë pasurinë pronarit të Alta Bankës, Davor Macura

Prokuroria serbe për Krim të Organizuar ia ka ndaluar pronarit të Alta Bankës, Davor Macura, si dhe disa kompanive të lidhura me të, të disponojnë me pasurinë e tyre. Masa përfshin prona të paluajtshme, tokë dhe pasuri afariste, ndër të cilat edhe rreth 35 hektarë tokë ndërtimore në hapësirën e ish-fabrikës së traktorëve IMT në Novi Beograd.

Informacionin e publikoi rrjeti hulumtues „Insajder”, duke iu referuar dokumentacionit të siguruar nga gazetarët e tij. Sipas të dhënave të publikuara, ndalimi përfshin edhe pasurinë e kompanive „Alta Holding” dhe „Alta Leasing”, si dhe tokë ndërtimore dhe një objekt banimi në pronësi të kompanisë „Campari International”, e cila është tërësisht në pronësi të Macurës.

Masa përfshin edhe pasurinë e tij personale, përfshirë prona të paluajtshme dhe tokë në lagjen Senjak të Beogradit, një objekt me tokë ndërtimore në Zemun Polje, një shtëpi familjare, garazh dhe tokë në Sopot, si dhe garazhe në Novi Beograd.

Vëmendje të veçantë tërheq toka e ish-kompleksit industrial IMT, ku kompania „ABL Solvent”, e lidhur me Macurën, në vitin 2021 bleu një pjesë të pronës nga masa e falimentimit për rreth 70 milionë euro. Më pas, duke u bazuar në dispozitat e Ligjit për Planifikim dhe Ndërtim, ajo fitoi pronësinë mbi rreth 35 hektarë tokë pa pagesë shtesë. Në këtë hapësirë ishte planifikuar ndërtimi i një kompleksi banesor me më shumë se 1.600 banesa dhe katër kulla të larta.

Lexo edheArrestohet pronari i “Alta Bankës” në Serbi, Davor Macura

Profesori i Fakultetit Juridik në Beograd, Goran Iliq, deklaroi për „Insajder” se, sipas vlerësimit të tij, pa dispozitën e kontestuar ligjore, kompania do të duhej t’i paguante shtetit rreth 250 milionë euro për tokën.

Macura dhe dy bashkëpunëtorë të tij dyshohen për keqpërdorim të pozitës zyrtare. Sipas pretendimeve të prokurorisë, gjatë një periudhe gjashtëvjeçare ata kanë nxjerrë në mënyrë të paligjshme rreth 380 milionë euro nga Alta Banka. Macura i mohon akuzat, ndërsa Gjykata e Lartë në Beograd i ka caktuar masën e paraburgimit deri në 30 ditë.

Rasti është pjesë e një hetimi më të gjerë për veprimtarinë e Alta Bankës, së cilës Banka Popullore e Serbisë ia hoqi licencën për punë në fund të tetorit. Pas kësaj, Banka Popullore e Maqedonisë së Veriut vendosi administrim të përkohshëm në Alta Banka SHA Manastir dhe kufizoi disponimin me mjetet e klientëve.

Më shumë për këtë

Burgim 30-ditor për Davor Macura, pronarin e “Alta Banka”Rajon · 1 javë më parëMacura i “Alta Bankës” i përfshirë edhe në këtë biznes në Maqedoninë e Veriut?Maqedoni · 1 javë më parë