Deputetja e Koalicionit qeverisës VLEN, Saranda Imeri Stafai, ka reaguar ashpër ndaj një provokimi seksist nga Valon Haskaj, bashkëpunëtor i Bujar Osmanit dhe i punësuar nga BDI-ja në Ministrinë për Çështje Evropiane.
Këtë sjellje të Haskajt ajo e ka denoncuar përmes një statusi në rrjetet sociale duke bërë thirrje për respekt dhe dinjitet ndaj grave në hapësirën publike.

Në reagimin e saj, deputetja ka theksuar se ndonëse njerëzimi sot aspiron shëtitjet në Mars, ajo ende përballet me sulme të ulëta personale. Ajo ka shprehur krenarinë për karrierën e saj artistike, duke theksuar se të qenit artist është një dhuratë e veçantë nga Zoti.

Duke iu referuar një videoje të publikuar nga Haskaj, Stafai ka zbuluar se ajo është xhiruar gjatë kohës kur ajo po trajtohej nga kanceri dhe se flokët e saj në atë video janë parukë. Me këtë, ajo ka dëshmuar forcën dhe vendosmërinë e saj përballë sfidave të jetës, duke theksuar se sulmet e tilla nuk do ta ndalin.

“Tipa si ky Valoni dhe ai Valoni tjetër që zgërdhihet poshtë te reagimet, përkundrazi, nuk më zbrapsin. Askush nuk ka të drejtë të ushtrojë këtë lloj dhune ndaj askujt!”, ka theksuar deputetja.

Në fund të reagimit, Stafai ka dhënë një mesazh inkurajues për gratë që të ecin përpara pa u ndikuar nga sulmet seksiste, ndërsa ka kritikuar sjelljen e Haskajt, duke thënë se kolegët e tij në punë, bashkëshortja dhe fëmijët e tij duhet të ndihen të turpëruar për veprimet e tij.