Edhe pse Alternativës iu morën të gjitha ministritë, ajo e Shëndetësisë, Shoqërisë Informatike e Administratës dhe ministria e Diasporës, dhe të gjitha postet e zëvendës ministrave përveç të atij në Ministrinë e Kulturës, partia e Afrim Gashit e pret ditën e nesërme për t’u prononcuar.

Alternativa prej ditësh nuk ka dhënë përgjigje të prerë nëse mbetet apo jo në Qeveri me arsyetimin se pret finalizimin e marrëveshjes midis Kovaçevskit dhe Taravarit.

Të pyetur nga Alsat nga Alternativa nuk dëshirojnë të komentojnë emrat e dorëzuar në Kuvend, por thonë se kryeministri e ka ditur se kjo parti do të mblidhet nesër për të marrë dhe kumtuar vendimin.

“Kovaçevski e ka ditur se ne e kemi mbledhjen e Kuvendit të partisë nesër dhe nuk e dimë pse ai sot ka dorëzuar në Kuvend nismën për rikontruimin e Qeverisë. Për këtë do të duhet ta pyesni Kryeministrin. Ne do të flasim nesër pas mbledhjes së Kuvendit”, thanë nga Alternativa për Alsat.

Ndërkohë LSDM thotë se për Alternativën dera e bashkëpunimit mbetet e hapur

“Dërgojmë apel deri tek Alternativa se dera për bashkëpunim është e hapur edhe më tej. Këto kohë janë të rëndësishme për ardhmërinë evropiane dhe për reformat ekonomike dhe u bëjmë thirrje të ngrihen mbi interesat e ngushta partiake dhe të mendojnë edhe njëherë. Edhe pse Alternativa nuk u përgjigj në ofertën për mbështetjen e bashkëpunimit, partia është e mirëseardhur me kontributin e saj për koalicionin evropian”, tha Darko Kaeski, LSDM.

Pas marrëveshjes midis Kovaçevskit dhe Travarit, Alternativa në Qeveri mbetet pa asnjë ministri, por me vetëm një zv/ministër. Në listën e të shkarkuarve nuk u gjet emri i zv/ministrit të Kulturës Daim Luçi, i afërt me deputetin Skender Rexhepi – Zejd i cili kohë më parë njoftoi se shkëputet nga Alternativa për të vepruar si i pavarur. Luçi së bashku me disa aktivistë të Alternativës më herët dolën kundër politikave të liderit të partisë së tyre dhe kërkonin shkarkimin e ministrit të Shëndetësisë.

Alternativa e Afrim Gashit marrëveshjen për hyrjen në Qeveri e firmosi më 5 dhjetor të vitit 2021 me kryeministrin e atëhershëm Zoran Zaev. Marrëveshja përmbante nëntë pika, ndër të cilat ishte integrimi në BE, zbardhja e rasteve gjyqësore të cilat dyshohen si të montuara, si Monstra, Alfa, Lagjja e Trimave. Në agjendë ishte edhe lufta kundër korrupsionit dhe cilësia në Arsim. Hyrja e Alternativës në Qeveri erdhi menjëherë pas dështimit të VMRO-DPMNE-së për të krijuar shumicë të re së bashku me partinë e Gashit, Aleancën për Shqiptarët, Besën dhe Levicën e Apasievit./Alsat.mk